Чөлөөт бөх: ОХУ-ын багийн 26 гишүүнийг ДАШТ-д оролцуулахгүй

Дэлхийн бөхийн нэгдсэн холбооноос энэ сарын 16-нд Сербид эхлэх сонгомол барилдаан, чөлөөт бөхийн ДАШТ-д оролцох ОХУ, Беларусын шигшээ багт хийсэн шалгалтынхаа дүнг танилцууллаа. Украины дайны улмаас энэ хоёр орны баг олон улсын тэмцээнд оролцох эрхээ алдаад байсан билээ.

ДБНХ-ны тайланд “ДАШТ-д оролцох ОХУ, Беларусын шигшээ багийн мэдүүлгэнд багтсан 235 хүнийг бид маш нягт шалгаж дууслаа. Энэ 235 хүн дотор сонгомол, чөлөөтийн бөхчүүд, дасгалжуулагч, албаны хүмүүс бүгд багтсан. Манай тусгай комисс хараат бус болон хувийн мөрдлөгийн байгууллагуудаас өгсөн мэдээллийг нягталж шалгаад 26 хүнийг ДАШТ-д оролцох боломжгүй гэж үзлээ. Энэ 26 хүн дайныг идэвхтэй дэмжсэн, эсвэл ямар нэг хүчний байгуулагад харьяалагддаг болох нь тогтоогдсон” гэж дурджээ.

Дэлхийн бөхийн нэгдсэн холбооноос энэ 26 хүний нэрийг дурдсангүй, бөх үү, албаны хүн үү гэдгийг зарласангүй. Янз бүрийн эх сурвалжаас үзэхэд олимпын аварга Абдулрашид Садулаев, Заурбек Сидаков, Завур Угуев нарын нэрс дурдагдаж байна. Одоогийн байдлаар ОХУ-ын шигшээ баг Москвагийн ойролцоо бэлтгэлд гараад байгаа бөгөөд дээрх гурван бөх цугларалтад оролцож байгаа.