Тэрүнофүжи Намрын тэмцээнд барилдахгүй

Мэргэжлийн сүмогийн ганц аварга Тэрүнофүжи энэ Ням гарагт Токиод эхлэх Намрын тэмцээнд барилдахгүй болжээ. Түүний багш Исэгахама ояката энэ талаар сэтгүүлчдийн асуултад хариуллаа.

-Яагаад барилдахгүй болов?

-Нурууны бага зэргийн гэмтэлтэй байгаа. Хоёр гурван хоноийн өмнөөс хоёулаа ярилцаж байгаад өчигдөр зодоглохгүй байхаар шийдвэрлэсэн. Эмнэлэгт очиж үзүүлсэн ч барилдах боломж байхгүй байлаа.

-Тэмцээний голоос барилдах боломж байгаа юу?

-Нэг сарын эмчилгээ шаардлагатай байгаа тул барилдахгүй. Давах ялах боломжтой болсон хойноо л барилдана.

-Өвдөгний бэртэлтэй нь адилхан хүнд гэмтэл үү?

-Нэлээд эртнээс нуруугаар нь тог гүйж байгаа юм шиг болоод байдаг байсан. Барилдсан ч ямар ч хүч гаргаж болдоггүй болчихдог юм байна лээ.

-Мэс засалд орох уу?

-Одоогийн байдлаар бол орохгүй. Одоо дусал хийлгэж, тариа тариулан, өвчинг нь намдаах эмчилгээ хийж байна. Болохгүй бол дараагийн шатны эмчилгээнд орно. Өвдөг зүгээр байгаа ч нуруу л болохгүй байгаа юм.