Чөлөөт бөхийн ДАШТ: Манай бөхчүүдийн барилдааны дүн

Сербийн нийслэлд чөлөөт бөхийн ДАШТ үргэлжлэн явагдаж байна. Өчигдөр манай таван бөх дэвжээнд гарсан.

Эмэгтэй 50 кг-д ДАШТ-ий мөнгө, хүрэл медальт, Монгол Улсын гавьяат тамирчин Долгоржавын ОТГОНЖАРГАЛ алтан медалийн төлөө барилдахаар шалгарсан.

55 кг-д Японы бөх, дэлхийн хошой аварга Харүна Окүнод 2:9 оноогоор хожигдсон Ч.Отгонтуяа дагах барилдаанд дэлхийн залуучуудын аварга, Беларусын Арина Мартыноваг цэвэр ялаад, дараа нь 2022 оны ДАШТ-ий хүрэл медальт, Канадын Карла Годинест 1:5 оноогоор ялагдав.

57 кг-д олимп, дэлхийн хүрэл медальт, Монгол Улсын гавьяат тамирчин Бат-Очирын БОЛОРТУЯА эхний тойрогт хийлж, хоёрдугаар тойрогт 2022 оны ДАШТ-ий хүрэл медальт, Европийн хошой аварга, дэлхийн чансааг тэргүүлэгч Украины Алина Хрушина Акобиятай барилдах байсан ч өрсөлдөгч бөх гэмтлийн улмаас гарсангүй. Ингээд гуравдугаар тойрогт Унгарын бөх Рамона Галамбошт 5:6 оноогоор ялагдав.

65 кг. Т.Энхжин эхний тойрогт хийлж, хоёрдугаар тойрогт Европын хошой аварга, Болгарын Мими Христоватай барилдаж, 0:10 оноогоор цэвэр ялагдлаа.

76 кг-д Н.Загардулам эхний тойрогт Африк тивийн хошой аварга Нигерийн Ханна Рюебентэй барилдаж, 7:13 оноогоор ялагдав.