Чөлөөт бөхийн ДАШТ: Өнөөдөр манай 5 бөх барилдана

Сербийн Белград хотод болж байгаа чөлөөт бөхийн ДАШТ-ий 5 дахь өдөр эмэгтэйчүүдийн 53 кг, 62 кг, 68 кг, 72 кг-ын жингийн урьдчилсан болон хагас шигшээ барилдаанууд, 50, 57, 65, 76 кг-ын жингийн медалийн төлөөх барилдаанууд явагдана.

Эмэгтэйчүүдийн 50 кг-ын жингийн финалд МУГТ Д.Отгонжаргал, Японы Юи Сүсакитай алтан медалийн төлөө барилдана.

Эмэгтэйчүүдийн 53 кг-д цэргийн дэлхийн аварга, U23 ДАШТ-ий хүрэл медальт, ОУХМ Ганбаатарын Отгонжаргал Шведийн бөх, Европын хошой аварга Ионна Малмгрентэй таарсан. Ялахад Канад, Венесуэлийн бөхчүүдийн ялсантай барилдана. Түүний талд АНУ, ОХУ-ын бөхчүүд байгаа бол Японы супер охин Акари Фүжинами нөгөө талд хуваарилагджээ.

Эмэгтэйчүүдийн 62 кг-д дэлхийн аварга, МУГТ Пүрэвдоржийн Орхон БНХАУ-ын тамирчин, ДАШТ-ий мөнгөн медальт, Ази Тивийн аварга Лон Жиатай эхний барилдаанаа хийнэ. Ялахад Канад, Мексикийн тамирчдын давсантай учрах юм. Түүний талд Киргизийн Тынибекова байгаа бол нөгөө талд Япон, Америк бөхчүүд оржээ.

Эмэгтэйчүүдийн 68 кг-д ОУХМ Энхсайханы Дэлгэрмаа Сербийн Эмилия Яковлевичтой учраа таарав. Ялахад Канад, Казахстаны ялсан бөхтэй барилдана. Энэ талд АНУ, хятад бөхчүүд бий.

Эмэгтэйчүүдийн 72 кг-д ОУХМ Энх-Амарын Даваанасан Польшийн Наталья Стрзалкатай эхний тойрогт барилдана. Давсан тохиолдолд Канад, Болгарын давсантай таарна. Түүний талд Казахстаны бөх байгаа бол Япон, АНу бөхчүүд нөгөө талд бичигджээ.

9-р сарын 20 Лхагва

Эмэгтэй чөлөөт

16:30. Дагах барилдаан 50, 57, 65, 76 кг. Урьдчилсан барилдаан 53, 62, 68, 72 кг.

23:00. Хагас шигшээ 53, 62, 68, 72 кг.

00:00. Медалийн төлөөх барилдаан 50, 57, 65, 76 кг.

03:00. 5-р байрны төлөөх барилдаан (олимпын эрх) 50, 57, 76 кг.