Ханжоу 2022: О.Өнөболдын өрсөлдөгч Сакен Бибосынов

Азийн наадмын боксын төрлийн өрсөлдөөний хоёр дахь өдөр буюу өнөөдөр манай хоёр эрэгтэй боксчин рингэнд гарна.

20:30 цагаас 51 кг жинд О.Өнөболд Казакстаны Сакен Бибосыновтой таарсан. Казах залуу 2020 оны олимпын хүрэл медальт, 2021 оны дэлхийн аварга, 2019 оны ДАШТ-ий хүрэл медальт, Азийн АШТ-ий мөнгө, хүрэл медальтай тамирчин. Түүнийг ялахад БНСУ, Узбекистаны ялсантай гээд тун хатуухан сугалаа таарчээ.

Ер нь Азийн наадмын боксын сугалааг тамирчдын чансааг огт харгалзалгүй оноосон байна. ОУОХ-ноос сонирхогчдын боксын IBA холбоог хүлээн зөвшөөрдөггүйтэй холбоотой биз ээ.

Эрэгтэй 51 кг-д манай О.Өнөболдтой үзэлцэх Казахстаны Сакен Бибосынов дараагийн өрсөлдөгчөө яриад эхэлсэн байна. Тэрээр эхний тулаандаа ялаад 1/8 финалд Узбекистаны Хасанбой Дусматовтай таарах болно гэдэгтээ итгэлтэй байгаа ажээ.

Сакен 2020 оны олимпын хүрэл медальт, 2021 оны дэлхийн аварга, 2019 оны ДАШТ-ий хүрэл медальт, Азийн АШТ-ий мөнгө, хүрэл медальтай. Харин узбек залуу Хасанбой Дусматов 2016 оны олимпын аварга, 2023 оны дэлхийн аварга, 2017 оны ДАШТ-ий мөнгөн медальт, 2018 оны Азийн наадмын мөнгөн медальт, Азийн 3 удаагийн аварга тамирчин. Энэ хоёр тамирчин сүүлийн хэдэн жил хоорондоо ширүүн өрсөлдөж байгаа. Сакен бол Узбекистан төрсөн ч дараа нь Казахстандаа буцсан. Сакен "Бид Дусматовыг сайн судалсан. Тактик бэлэн байгаа. Миний хувьд багш нарын бэлтгэсэн тактикаар тоглох л үлдсэн. 51 кг их өрсөлдөөнтэй жин. Энэтхэг, Япон, Таиландын боксчид хүчтэй" гэж сэтгүүлчдэд ярьжээ.