Рубен Аморим: Би Брунод хэлдгээ хэлчихсэн

Э.Мөнхжин | Zindaa.mn
2025 оны 04 сарын 01


Английн “Манчестер Юнайтед”-ын ахлагч Бруно Фернандешийг Испанийн “Реал Мадрид” ирэх зун авахаар төлөвлөж, бүр 90 сая паунд ч гаргахад бэлэн гэсэн мэдээ хэвлэлүүдээр сүүлийн хэдэн өдөр түглээ.

“Улаан чөтгөрүүд”-ийн ахлах дасгалжуулагч Рубен Аморимоос хэвлэлийн бага хурал дээр энэ талаар ямар байр суурьтай байгааг нь сэтгүүлч лавлахад элэг нэгт ахлагчаа яалаа ч явуулахгүй гэжээ.

“Үгүй дээ, тийм юм болохгүй. Яагаад би ийм их итгэлтэй байна гээч? Яагаад гэвэл би Брунод хаашаа ч явуулахгүй шүү гэдгээ хэлчихсэн. Магадгүй энэ улиралд бид урьд байгаагүй муу дүнтэй явж байж болно. Гэхдээ л Бруног энд байгаасай гэж би хүсч байна.

Дахиад Премьер лигт түрүүлэхийг бид хүсч буй учраас багийн шилдэг тоглогчид эндээ байх ёстой. Одоо 30 настай ч гэлээ улиралдаа 53 тоглолтод гарч, 33 гоолд шууд оролцсон хэвээрээ. 2027 оны зун хүртэл гэрээтэй болохоор бид хяналтаа алдаагүй. Тэгээд ч Бруно эндээ жаргалтай байх шиг санагддаг. Өөрөө “Манчестер Юнайтед”-ын фанат шүү дээ. Заримдаа та нар Бруногийн үйлдэл, хөдөлгөөнийг харчихаад ахлагч хүнд байхааргүй гэж шүүмжилдэг л байх. Гэвч тэр үйлдэл чинь багийн дүн муу байгаад сэтгэл зовсных юм. Бид ийм сэтгэлтэй тоглогчоо алдахыг хүсэхгүй” хэмээн Рубен Аморим өгүүлжээ.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Close menu