Үйлдвэрийн алдаанаас болж "Ювентус" өмсгөлийнхөө өнгийг үүрд сольжээ

Италийн лигтээ 36 удаа түрүүлж, Аваргуудын лигийн Дэлдэн чихтийг хоёрантаа гардсан “Ювентус” клуб эхний хэдэн жилдээ овойсон том амжилтгүй явлаа. Өмсгөл нь ч одоогийнхоос өөр өнгөтэй. Ямар өнгөтэй гээч? Бүр ягаан шүү.

Тухайн үеийн хөлбөмбөгийн багууд ихэвчлэн тод өнгө сонгосон тул “Ювентус” ялгарахын тулд ягааны өнгөөр гоёжээ. Ер нь тэр үед эзэн болон зочин багийн өмсгөлтэй клуб ч цөөхөн байсан гэдэг.

Хэдэн жилийн турш ягаан өнгөөр ялгарсан “Ювентус”-ынхан 1903 онд өмсгөлөө дахин шинээр хийлгэхээр шийджээ. Ингээд нэхмэлийн нэгэн үйлдвэрт хандсан байна. Гэхдээ тэр үйлдвэр нь Английн Ноттингэмийнх. Яагаад гэхээр “Ювентус”-ын анхны гадаад тоглогч Жон Сэвиж англи хүн. Хөлбөмбөгчид тухайн цаг үед өндөр цалин авдаггүй тул давхар ажил эрхэлнэ. Харин Жон Сэвиж сүйхээтэй наймаачин учир танил тал ихтэй. Ноттингэмийн нэхмэлийн үйлдвэртэй ярилцаад хямдарсан үнээр өмсгөл хийлгэхээр тохирсон хэрэг. Ингээд захиалгаа өгчихөөд хүлээж эхэллээ. Хэдэн долоо хоногийн дараагаар өмсгөл ч баглаа боодолтой ирлээ гэнэ. Бөөн баяр болсон хүмүүс боодлыг задлаад үзтэл нөгөө ягаан өнгө ор тас байхгүй болж, харин хар-цагаан судалтайг илгээжээ.

Яагаад өнгийг ингэж дур мэдэн өөрчилснийг тодруулахад Жон Сэвижийн авч очсон хуучин өмсгөлийнх нь өнгө ягаан гэж бараг мэдэгдэхгүй энд тэндээ бараан өнгө үсэрсэн байж. Үүнийг нь хараад ягаандуу юмуу даа гэж таамагласан ч тархи толгойгоо гашилгаж сууя гэлгүйгээр өөрсдийнхөөрөө хийгээд үзэхээр шийдэж, Английн “Ноттс Каунти”-тай клубынхтай адилхан хар-цагаан өнгөтэй болгоод илгээчихжээ.

“Хэрвээ энэ өнгө таалагдахгүй байвал та бүхэн бэлэг гэж бодоод авчих. Бид бодит өнгийн дагуу дараагийн удаад үйлдвэрлээд явуулъя” гэх захиа дайсныг “Ювентус”-ынхан уншаад, маргааш биш бараг өчигдөр хэрэгтэй байсан өмсгөлийг ирсэн нь их юм гээд өмсөхөөр болжээ. Ингэж л заримдаа зебра ч гэж нэрлэдэг хар-цагаан өнгийн өмсгөл үүрд “Ювентус”-ыг илэрхийлэх болсон байна.