Дин Хендерсон фанатуудыг “даажээ”

Английн Супер цомыг “Кристал Пэлас” өчигдөр гардлаа. 119 жил цом өргөж үзээгүй клуб гурван сарын өмнө Холбооны цомын финалд “Манчестер Сити”-г хожиж, түүхэндээ анхны цомоо өргөсөн.

Тэгвэл өчигдөр Супер цомын төлөө Премьер лигийн аварга “Ливерпүүл”-тэй тулж, тоглолтын явцад хожигдож яваад Жан-Филипп Матета болон Исмаил Саррын гоолоор үндсэн цагт тэнцээд, пенальтиар ялагчийг тодруулахад Алексис Макаллистер, Харви Эллиот хоёрын цохилтыг “Бүргэдүүд”-ийн хаалгач Дин Хендерсон хааснаар багтаа ялалт авчирсан юм.

“Манчестер Юнайтед”-ын академийн бүтээгдэхүүн Дин Хендерсон Английн шигшээд дуудагдсанч гэмтлийн улмаас сайхан боломжоо алдсан түүхтэй.

“Бүргэдүүд”-ийн фанатууд түүнийг маш сайн дэмждэг. Тэгвэл бүр ч их дэмжүүлэх үйлдэл өчигдөр орой хийсэн байна. “Кристал Пэлас”-ын фанатуудын цугладаг The Allsopp Arms уушийн газар зорин очиж, тэнд цугларч, хайртай багийнхаа түүхэн ялалтыг тэмдэглэж буй фанатуудын  уух юмны мөнгийг Дин Хендерсон “даажээ”.

“Дөнгөж саяхан Дин Хендерсон энүүгээр ороод гарлаа. Бид бүгдийн шар айрагны төлбөрийг даана гээд мөнгө үлдээгээд явлаа. Домог юм аа. Энэ клубыг үнэхээр хүндэлж, мэддэг юм байна” хэмээн нэгэн фанат сошиалд бичжээ.

“Би ийм сэтгэл түгшээм том тоглолтод дуртай. Манай багийнхан пенальти дээр маш сайн ажилласан. Өрсөлдөгч сайн хөлбөмбөгчидтэй хүчирхэг баг.

Бидний хувьд гурван сарын хугацаанд хоёр цом гэдэг арай л итгэмээргүй амжилт. Сэтгэл хөдлөл дээд цэгтээ хүрлээ. 2:1 болоход ингээд дууслаа л гэж бодсон. Гэвч дасгалжуулагч “Боломж гарна аа, заавал гарна” гэсэн юм. Тэр нь ч үнэн байж, үнэхээр боломж гарсан” гэж Дин Хендерсон өгүүлжээ.

Дин Хендерсон Холбооны цомын финалд ч тоглолтын явцад пенальти хааж, цом гардахад маш чухал үүрэг гүйцэтгэсэн.