“Арсенал” Эбэрэчи Эзе-г “Тоттенхэм”-ийн хамар дороос “суйлав”

27 настай Эбэрэчи Эзе 14 жилийн өмнө өөдтэй хөлбөмбөгч болохгүй гээд голсон Английн “Арсенал”-д эргэн очихоор боллоо.

Өнгөрсөн ням гаригийг хүртэл “Их буучид” Эзе-г авъя гэсэн тогтсон шийдгүй байлаа. Гэвч Премьер лигийн эхний тойрогт “Манчестер Юнайтед”-тай тоглохдоо Кай Хаверц гэмтсэн тул довтолгоонд тоглогч нэмж авахаас өөр аргагүй байдалд орсон юм.

“Арсенал” аваргын төлөө тэмүүлэх баг тул хамгийн сайнаас нь авахаар шийдэж “Кристал Пэлас”-ын гялбаа болсон Эбэрэчи Эзе дээр сонголт буужээ.

Энэ зуны эхээр Эзе-г авах талаар “Арсенал” ярилцаж, сонирхож үзсэн ч гэлээ 60 сая паундын босго үнийг төлөхөөс цааргалж, албан ёсоор үнийн санал тавилгүй өнгөрсөн байна.
 

Тэгж байтал тэдний заналт хөрш “Тоттенхэм”-ийн довтолгооны гол тоглогч Жэймс Мэддисоны өвдөгний чагтган холбоос тасарч, олон сараар эмчилгээ хийлгэж, гам барих шаардлагатай болов. Тиймээс Даниел Левиг “Бүргэдүүд”-ээс Эбэрэчи Эзе-г авахаар яриа хэлэлцээрээ эхлүүлж, хоёр тал наймааны үнэ дээр тохиролцож, Эзе ч очихоор зөвшөөрчихөөд байжээ. 

Гэхдээ “Бүргэдүүд” өнөө шөнө Конференц лигийн сонгон шалгаруулах шатанд Норвегийн “Фредрикстад”-тай тоглолттой учир энэ тоглолтод оролцсоных нь дараа аваарай гэж “Тоттенхэм”-ийнхэнд хэлсэн байна. Ингээд тэрхүү тоглолтыг хүлээж, хоёр гурван хоног өнгөрөх зуур Хаверц гэмтэж, улмаар “Арсенал” ажиллагаагаа яаравчлан эхлүүлснээр “Тоттенхэм”-ийн хамар дороос Эбэрэчи Эзе-г суйлаад авчихаж чадлаа. Хойд Лондоны хоёр клуб зэрэгцэн санал тавьсан энэ тохиолдолд Эзе багын хүсэл мөрөөдлөө дагаж, “Арсенал”-д зөвшөөрчээ.
 

“Уг нь би “Арсенал”-д тоглохыг мөрөөддөг байсан юм. Тиймээс намайг голоход маш хэцүү туссан. 13 настайдаа “Үгүй ээ” гэсэн үг сонсох үнэхээр хэцүү байж билээ. Сорил бэлтгэл хийлгэснийхээ дараа хасахад нь үймэрч, юунд ч анхаарлаа төвлөрүүлж чадахаа больтлоо балмагдсан. Түүнээс хойш өөр хэд хэдэн клуб намайг авахаас татгалзсан. Гэлээ ч “Арсенал”-ын “Үгүй” гэсэн нь дараа дараагийн сөрөг хариултуудыг дааж гарах тэнхээ өгсөн гэж боддог. “Хэрвээ би “Арсенал”-аас татгалзсан хариулт авчихаад тэр шаналлаа давж гарч чадаж байгаа юм бол өөр юуг ч даваад гарч чадна” гэсэн бодол төрж байсан” хэмээн 2022 онд өгсөн нэгэн ярилцлагадаа Эзе онцлон тэмдэглэж байжээ.
 

“Тоттенхэм”-ийн хувьд авчихсан гэж бодсон тоглогчоо алдсаныхаа дараагаар “Манчестер Сити”-гийн Савиньо, “Брэнтфорд”-ын Йоан Висса нарыг хөөцөлдөх бололтой.

Гэвч Виссад “Ньюкасл” аль хэдийн санал тавьчихсан бол Савиньог “Сити” зарахыг хүсэхгүй тухай мэдээ түгсэн. Гэвч мөнгө бүхнийг шийдэх нь тодорхой.
 

“Кристал Пэлас”-ын дасгалжуулагч Оливер Гласнер өнөө орой Эзе-г Конференц лигт тоглуулна гэснээрээ тоглуулах юм байна. Багаас нь Эзе-гээс гадна мөн хамгаалагч Марк Гүэхи ч явж магадгүй болсон. Түүнийг “Ливерпүүл” хөөцөлдөж байгаа юм.
 

"Тэд энд байгаа цагт гол үүргийг гүйцэтгэсэн хэвээр байх болно” гэж Оливер Гласнер хэлсэн байна лээ. Өөрөөр хэлбэл, өнөө шөнө Эзе “Бүргэдүүд”-ийн төлөө сүүлчийн үүргээ гүйцэтгэчихээд маргааш “Их буучид”-ын зүг одох ажээ.