ШҮҮХ | Э.Ган-Эрдэнэ, Э.Номин-Эрдэнэ, Х.Энхсайхан нарыг цагаатгалаа

Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн хуралдаан болж Ц.Дагвадорж хоёр хүний амь насыг хохироосон хэрэгт хамжигчаар оролцсон гурван хүнийг цагаатган шийдвэрлэлээ.

Шүүхийн тогтоолд дараах байдлаар тусгажээ.

“Шүүгдэгч Э.Номин-Эрдэнэ, Э.Ган-Эрдэнэ нарыг Эрүүгийн хуулийн ерөнхий ангийн 3.1.1 болон 3.5.1 дэх хэсэгт заасныг тус тус журамлан, мөн хуулийн тусгай ангийн 11 дүгээр зүйлийн хоёр дахь хэсгийн 2.1, 2.7, 2.11 дэх хэсэгт зааснаар яллах дүгнэлт үйлдэж ирүүлснийг Эрүүгийн хэрэг хянан шийдвэрлэх тухай хуулийн 34.19 дүгээр зүйлийн нэг дэх хэсгийн 1.1-т зааснаар гэмт хэргийн шинжгүй үндэслэлээр хэргийг хэрэгсэхгүй болгож, тэдгээрийг цагаатгасугай.

Нийслэлийн прокурорын газрын прокуророос шүүгдэгч Х.Энхсайханыг Эрүүгийн хуулийн ерөнхий ангийн 3, 5 дугаар зүйлийн нэг дэх хэсэгт заасныг журамлан мөн хуулийн тусгай ангийн 12.5 дугаар зүйлийн нэг дэх хэсэгт зааснаар яллах дүгнэлт үйлдэж ирүүлснийг Эрүүгийн хэрэг хянан шийдвэрлэх тухай хуулийн 34.19 дүгээр зүйлийн нэг дэх хэсгийн 1.1-т зааснаар гэмт хэргийн шинжгүй үндэслэлээр түүнд холбогдох хэргийг хэрэгсэхгүй болгож цагаатгасугай”

Шүүхийн тогтоолын дагуу шүүгдэгч Э.Ган-Эрдэнэ, Э.Номин-Эрдэнэ нарт цагдан хорих таслан сэргийлэх арга хэмжээ авсныг, Х.Энхсайханд тавьсна хилийн хоригийг цуцалж шийдвэрлэлээ.