”Ноён” -ы галзуу өсөлтийг хазаарласан комментууд

Ам.долларыг "ноён" гэж тодотгох нь бий. Тэгвэл долларын ханшийн галзуу өсөлттэй холбоотойгоор улстөрчид гэнэт ухаан орж, найр наадмаасаа бууцгаан, саарал ордондоо зөвлөлдөж сууна. Коммент булан валютын ханшийн чангаралттай холбоотой сэдвээр танд хүрч байна.

-Хоногт 30 төгрөгөөр чангарч дарамталсан ам.долларын монгол төгрөгтэй тэнцэх ханш өнөөдөр 1578 байна.

-Өчигдөр Монголбанк банкуудад 62.7 сая ам.долларыг 1571 хаалтын ханштайгаар, 155.5 сая юанийг 255.59 хаалтын ханштайгаар худалдсан. Ам.долларын нийлүүлэлт ханшийг буурууллаа гэж үзэгсэд байна.

- Монголбанк өнгөрсөн хугацаанд 47 удаагийн интервенц хийж, 830 орчим сая долларыг эргэлтэд оруулсан ч, ханш улам тэнгэрт хадаад байгаа нь, төв банкны валютын зах дахь оролцоо оновчтой бус байгааг илтгэж байгааг эдийн засагч Д.Жаргалсайхан хэлж буй.

-Эдийн засгийн суурь нөхцлөө дагаад төгрөгийн гадаад валюттай харьцах ханш алгуур суларч байсныг Монголбанкны Ерөнхийлөгчийн зөвлөх, Ерөнхий эдийн засагч С.Болд хэлж байна. Тэрээр “Өдрийн сонин”-д өгсөн ярилцлагадаа “...сүүлийн хэдэн долоо хоногт зах зээлд гарсан хэд хэдэн сөрөг муу мэдээллээс шалтгаалж ханшид огцом хэлбэлзэл бий болсон гэлээ. Тэдгээр нь  Стандарт банкны зээлтэй холбоотой, урьд өмнө огт сонсогдоогүй мэдээлэл нийтэд тархсан. Хоёрт, Хадгаламж банкны асуудал байна. Гэхдээ тус банкийг Төрийн банкинд шилжүүлэх арга хэмжээг Монголбанк 1 өдрийн дотор амжилттай хэрэгжүүлсний үр дүнд банкны үйлчилгээнд ямар ч гацаа үүсээгүй, үйл ажиллагаа нь хэвийн явагдсан бөгөөд нэг ч гүйлгээ саатаагүй юм. Ингэснээр валютын зах дээр ч томоохон савлагаа үүсээгүй, харьцангуй тайван байсан. Гуравт, Оюу толгойн төслийн санхүүжилт, хөрөнгө оруулалт нь УИХ-ын чуулганаар шийдвэрлэгдэх ч юм шиг, өөрөөр хэлбэл 10 сар хүртэл ямар ч шийдвэр гарахгүй хойшлох лугаа адил, Оюу толгойгоос бусад хөрөнгө оруулалтууд бүрмөсөн зогсчих мэтээр, улмаар валютын орох урсгалгүй болчих юм шиг мэдээллүүдээс үүдэлтэй сөрөг хүлээлт зах зээлд давамгайлаад байв. Олон улсын хэвлэл мэдээлэлд ч ийм утга, агуулгатай мэдээллүүд олноор гарч байсан. Үүний нөлөөгөөр Чингис бонд, Хөгжлийн банкны бондын үнэ ихээхэн унаж, гадаадын хөрөнгө оруулалттай аж ахуйн нэгжүүдийн хувьцааны үнэ огцом буурсан. Эдгээр хүчин зүйлс нь сая валютын захад ханш огцом хэлбэлзэхэд нөлөөлсөн хэмээн ярьж байна.

-Мөн тэрээр  сүүлийн хэдхэн хоногт гарсан валютын ханшийн огцом өөрчлөлт бол эдийн засаг, бизнесийн орчинд сөргөөр нөлөөлж болзошгүй, зохистой бус хөдөлгөөн байлаа л даа. Тиймээс ч Монголбанк валютын захад жинтэй оролцож, шаардлагатай зохицуулалтыг хийгээд байна. Цаашид бид хууль тогтоомж, төрийн мөнгөний бодлогод заасан чиг үүргийнхээ хүрээнд, шаардлагатай үед нь валютын захад оролцож, ханшийн огцом хөдөлгөөн, зохисгүй хэлбэлзлийг багасгана гэсэн байна.

-Монголбанк оны эхнээс  855 сая долларыг эдийн засагт эргэлтэд оруулж, мөнгөний нийлүүлэлт 28 хувиар өссөн нь ам.долларын ханшид нөлөөлж байна гэж байгаа.

-Манай улсын төлбөрийн урсгал дансны алдагдал  1.6 тэрбум ам.доллар,  тэрдундаа  гадаад худалдааны алдагдал 1 тэрбум ам.доллар хэвээрээ байгаа нь нөлөөлж байна.

-Эдийн засагт ДНБ-ий 10 хувьтай тэнцэх ачаалал өндөр байгаа ханшийг чангаруулахад нөлөөлж байгаа аж.

-Хэдийгээр Засгийн газрын өрийн бичиг гаргаж 1.5 тэрбум ам.доллар босгосон ч, бондын мөнгөнөөс 200-300 саяыг нь л эдийн засагт оруулж, бусдынх нь зарцуулалт, тэндээс хүртэх өгөөжийн асуудал бүрхэг байгааг мөн нөлөөлж байгаа бололтой.

- Оюутолгойн тодорхойгүй асуудлаас болж гадаадын хөрөнгө оруулалт 20 орчим хувиар буурсан гэх мэдээлэл байгаа бол Оюутолгойн далд уурхайн үйл  ажиллагаа зогсвол манай гадаадын хөрөнгө оруулалтын 80 хувь зогсоно гэх тооцоолол байна.