О.Писториус найз бүсгүйгээ хардсаны улмаас хөнөөжээ

Найз бүсгүйгээ буудаж хөнөөсөн Оскар Писториусын хэргийн үнэн учрыг олоход тус болох чухал мэдээллүүд дэлгэгдэж байгаагаараа олны анхаарлыг татаж байгаа юм. О.Писториусыг найз бүсгүйгээ хардсаны улмаас хөнөөсөн гэх таамгийг батлах мэдүүлгийг хуралдааны үеэр талийгаач Р.Стенкампын эх нэгтэй дүү Ким Мартин өгсөн байна. Тэрээр “Рива О.Писториуст хайргүй байсан. Хэрэг гарах шалтгаан энэ гэдэгт итгэлтэй байна. Шүүхийн шийдвэр шударга биш. Тэд нотлох баримтуудыг сайн шалгалгүй асуудалд хуумгай хандсан. О.Писториус миний дүүг андуурсандаа хаалганы цаанаас буудсан гэдэгт би итгэхгүй байгаа. Бид зөвхөн шударга үнэнийг л хүсч байна” хэмээн өгүүлжээ.  

О.Писториус найз бүсгүй Рива Стенкампыг хаалганы цаанаас буудаж хөнөөсөн бөгөөд шүүхэд “Найз бүсгүйгээ дээрэмчинтэй андуураад хөнөөчихлөө” гэсэн мэдэгдэл хийсэн юм. Шүүх үүнд нь итгэн “Бусдыг санамсар болгоомжгүйн улмаас хөнөөсөн” гэсэн үндэслэлээр таван жил хорих, ялыг гэрийн хорионд эдлүүлэх шийдвэр ногдуулсан билээ. Гэвч хохирогч бүсгүйн ар гэрийнхэн давж заалдан, шинэ баримтуудыг дэлгэснээр түүний хэргийг дахин сөхөөд байгаа юм. Хэвлэлд бичсэнээс үзвэл хэргийг эцэслэн шийдэх хугацаа дөхсөн тул О.Писториусын зүгээс “өрөвдүүлэх” тактик ч хэрэглэж байгаа бололтой. Тэрээр өмгөөлөгчийнхөө хүсэлтийн дагуу шүүх хуралдаанд хиймэл хөлгүй оролцжээ. Хэрвээ шинэ баримтуудыг үндэслэлтэй гэж үзвэл түүнд 15 жил хорих ял оноох магадлалтай юм. 

С.Алдар