Хоёр гаргүй хэдий ч хэвтэрт орсон 91 настай ээжийгээ асардаг залуу

БНХАУ-ын томоохон хотын нэг Чунцинд амьдардаг хоёр гаргүй атлаа газар тариалан эрхэлж, хэвтэрт байдаг ээжийгээ асардаг фермерийн талаар http://shanghaiist.com/ сайтад нийтэлжээ.

Фермер залуугийн амьдралын үнэн түүх нийтлэгдсэн даруйдаа маш олон уншигчийн сэтгэлийг хөдлөгсөн бөгөөд түүнд туслалцаа дэмжлэг үзүүлэх гэсэн хүмүүс сайтын редакци руу өдөр бүр залгаж байгаа гэнэ.

Олны анхааралд ороод байгаа фермер залуугийн хувьд долоон настай байхдаа цахилгааны осолд орж, хоёр гаргүй болсон бөгөөд өдгөө 48 настай юм. Түүнийг Чен гэдэг аж.

Тэр хэдийгээр хоёр гаргүй болсон ч амьдралдаа сөхөрсөнгүй, харин ч бүхнийг хийж бүтээхийн төлөө ийнхүү чадах бүхнээ хийж байгаа гэнэ. Тэрбээр зургаан хүүхэдтэй айлын хамгийн бага нь бөгөөд ах эгч нар нь тусдаа гарч, ээжийнхээ хамт амьдрах болжээ.

Гэвч 2014 оноос хойш түүний ээж бронхит өвчний улмаас хэвтэрт орсон байна. Өдгөө 91 настай ээжийнхээ төлөө Чен эрдэнэ шиш, олон төрлийн жимс ногоог тарьж ургуулан, мөнгө олж тэжээдэг болжээ. Тэрбээр ээжийгээ өдөрт гурван удаа хооллодог  гэнэ.

Үүгээр ч зогсохгүй Чен 20 гаруй ямаатай.

Хоёр гаргүй болсон долоон настай Чен хүүгийн бие даах чадвар, ажилч хичээнгүй занг тосгоныхон нь магтан ярьцгаадаг бөгөөд тэрбээр аль хэдийнэ хотынхоо хүн бүрт танигдсан байна.

Чен хоол хийх, аяга угаах, эрдэнэ шишээ ялгах гээд бүхий ажлыг хөлөөрөө хийдэг бөгөөд энэ талаараа “Заримдаа хөл минь гараас илүү чухал эрхтэн юм гэж бодол төрдөг. Би бусдаас тусламж гуйхын оронд энэ амьдралыг өөрийнхөөрөө хэрхэн давж туулах вэ гэж тунгаан боддог. Аливаа зүйлийг хэцүү гэж бодоод байвал амар хялбар бүтэхгүй шүү дээ” гэжээ.

Түүний талаарх нийтлэлийн дор нэгэн хятад эмэгтэй “Би түүний ээжийгээ хооллож байгаа зургийг хараад маш их уйллаа. Түүн шиг хүн олон байгаасай. Хүн хичээвэл яаж ч амьдарч чаддаг юм аа гэдэг бодит жишээ энэ байна. Чений гэр бүлд аз жаргал хүсье” гэж бичсэн байна. 

О.Анир

Эх сурвалж: http://shanghaiist.com/