“Б.Содномдаржаа, Т.Чимгээ нарын дөрвөн жилийн гай зовлонг ямар ч үнээр төлж чадахгүй”

ХЗДХ-ийн сайд Ц.Нямдоржоос С.Зориг агсны хэрэгтэй холбоотой дараах асуултуудад хариулт авлаа.

-Байнгын хорооны өчигдрийн /2019.05.08/ хуралдаанаар авахыг Засгийн  газарт С.Зориг агсны хэрэгт холбогдогчдод хуулийн хүрээнд яаралтай арга хэмжээ чиглэл өгөх тухай яригдсан. Одоо үйл явц хэрхэн өрнөх вэ?

-Цагдаа дээр эрүүдэн шүүсэн, гүйцэтгэх ажиллагааны хууль зөрчсөн гэсэн хоёр хэрэг шалгагдаж байгаа. Хуулиараа прокурор шинэ нөхцөл байдлын дүгнэлт бичих ёстой. Дараа нь Дээд шүүхийн хурлаар орно. Эрүүдэн шүүсэн асуудал, гүйцэтгэх ажиллагааны хууль зөрчсөн асуудал, Б.Содномдаржаа, Т.Чимгээ хоёрыг хэрхэх вэ гэдэг асуудал яригдах байх.

-Б.Содномдаржаа, Т.Чимгээ нарыг хэрхэх вэ?

-Хэлмэгдэж, хэлсээр шийтгүүлсэн бол хохирол нөхөн төлөх тухай асуудал яригдана. Гэхдээ төлж чадахгүй. Энэ хүмүүсийн амьдралд учирсан дөрвөн жилийн гашуун гай зовлонг ямар ч үнээр төлж чадахгүй. Цаад талд нь үр хүүхэд нь, ээж нар нь, ах дүү нар нь хохирсон.

-С.Зоригийн хэргийн захиалагчийг илрүүлэх ажилд ахиц гарсан уу?

-Тагнуул дээр байгаа. Шалгагдана. Шүүхийн шийдвэртэй асуудал захиалагчийг илрүүлэхэд асар их саад учруулах байх. Бүр төөрүүлээд хаячихсан юм билээ. Б.Булганыг гэхэд арван сар хориод сулласан. Юу ч биш болгосон. Хохирогч биш болсон. Ертөнцийн түүхэнд байж боломгүй сонин зүйл болсон. Хажууд нь байсан цорын ганц амьд гэрчийг оролцуулаагүй. Одоо захиалгатайгаар элдэв юм ярьж байна. Ямар ч байсан эрүүдэн шүүсэн нь дэндүү тодорхой болсон. Өдрөөс өдөрт шинэ баримт гарч ирж байгаа. Гүйцэтгэх ажиллагааны хууль зөрчсөн явдал дэндүү ойлгомжтой байгаа. Алхам тутамдаа хуулийн зөрчил байсан.

-Эрүүдэн шүүх даалгаврыг хэн өгсөн бэ?

-Шалгалтын явцад тогтоогдоно. Бие бие рүүгээ чихээд байгаа гэсэн. Хоригдож байгаа гурван хүн байна. Цаашид хариуцлагад татах хүмүүс нэмэгдэнэ.

-Б.Хурцыг ямар учраас үргэлжлүүлэн хорих шийдвэр гаргасан юм бол?

-Би яаж мэдэх вэ. Хорих шийдвэр гаргасан байгууллагаас нь асуу.

ШУУД ҮЗЭХ