Г.Батхүү агсан хоёр давхраас унасан байх магадлалтай

Төр, нийгмийн зүтгэлтэн, УИХ-ын гишүүн асан Г.Батхүү өнгөрөгч баасан гарагт (2019.05.17) Төрийн ордонд зуурдаар нас барсан нь Монголын улс төр төдийгүй нийгэм даяар цочирдом харамсалтай үйл явдал боллоо. Тэрээр УИХ-ын дэд дарга, УИХ-ын гишүүн, Засгийн газрын гишүүнээр ажиллаж байсан бөгөөд Ардчилсан намын дэд даргын албыг хашиж байсан нэгэн юм. Мөн “АПУ” ХК, “Шунхлай” ХХК-ийн захирлаар ажиллаж байсан билээ.

Уг хэргийн талаар эргэн тодруулахад, хүн нас барсан гэх дуудлага цагдаагийн байгууллагад тухайн оройн 19:57 цагт ирсэн бөгөөд дуудлагын дагуу цагдаагийн шуурхай бүрэлдэхүүн хэргийн газарт очиж хамгаалалтад аван үзлэг шинжилгээг эхлүүлсэн юм. Шалгалтын явцад хохирогч нь УИХ-ын гишүүн асан Г.Батхүү болох нь тогтоогдсон бөгөөд урьдчилсан байдлаар талийгаачийн үхэлд гадны нөлөө байгаагүй гэж дүгнэсэн.

Тэрээр Төрийн ордны нэгдүгээр давхарын корридорт нас барсан байдалтай олдсон бөгөөд толгойн хэсгээс их хэмжээний цус асгарсан байсан нь шатнаас унаснаас үүссэн гэмтэл байж болзошгүй хэмээж байв. Харин эх сурвалжийн мэдээлж буйгаар талийгаач Төрийн ордны хоёр давхрын баруун жигүүрт байрлах Засгийн газрын хуралдааны танхимын үүдний гонхоор унасан байх магадлалтай аж.

Урьдчилсан дүгнэлтээр Г.Батхүү агсан гадны нөлөөгүй, зүрх нь гэнэт зогссоны улмаас амь насаа алдсан гэж буй. Уг хэргийг Нийслэлийн цагдаагийн газрын мөрдөн шалгах газарт шалгаж байгаа юм.

Хэрэг явдалтай холбогдуулан бямба гарагт Ардчилсан намаас албан ёсоор мэдэгдэл гаргахдаа  “Ардчилсан Намын дэд дарга Гаваагийн Батхүү нь 2019 оны тавдугаар сарын 17-ны өдөр 19 цагийн орчим Төрийн ордонд учир битүүлгээр амь насаа алдсан цочирдом үйл явдал боллоо. Тэрээр тухайн өдөр Төрийн ордонд болсон “Торгоны зам” олон улсын автораллиг зохион байгуулах ажлын хэсгийн хуралд 15.00-18.00 цагийн хооронд оролцсон юм. Төрийн тусгай хамгаалалттай, онцгой объект болох Төрийн ордны баруун жигүүрт өндрөөс унасан байх магадлалтай, амь насаа алдсан нь гадны нөлөөтэй байж болзошгүй гэсэн хардлагыг төрүүлж байна. Төр нийгмийн зүтгэлтэн агсан учир битүүлгээр амь насаа алдсан энэ хэргийн талаар холбогдох хууль хяналтын байгууллага одоог хүртэл тодорхой мэдээлэл өгөлгүй, хэвлэлд хаалттай байна. Түүний хувьд хууч өвчин байхгүй, хамгийн сүүлд 2019 оны дөрөвдүгээр сард бүх төрлийн шинжилгээ оношлогоонд хамрагдаж, эрүүл мэндийн хувьд ямар нэг өвчингүй гэдэг нь нотлогдсон байсан юм. Ардчилсан намын дэд дарга ажил үүргээ гүйцэтгэж явахдаа Төрийн ордонд сэжигтэй байдлаар амь насаа алдсан шалтгааныг үнэн зөвөөр, нэн яаралтай тогтоож, учир шалтгааныг ард түмэнд нээлттэй мэдээлэхийг шаардаж байна” гэсэн юм.

Харин НЦГ-ын зүгээс “Олон нийтийн сүлжээгээр энэ хэрэгтэй холбоотой худал ташаа мэдээлэл гарч, олон нийтийг төөрөгдүүлж байна” хэмээн мэдэгдээд байна.

УИХ-ын дэд дарга, УИХ-ын гишүүн, Засгийн газрын гишүүн асан эрхэм Төрийн ордонд зуурдаар нас барсан эл хэрэг олон нийтийг чамгүй цочирдуулаад буй бөгөөд шалтгаан, нөхцлийг тогтоохоор Прокурорын байгуулллагын хяналттайгаар НЦГ-ын Мөрдөн шалгах газарт үргэлжлүүлэн шалгаж байна.