“Туркойз Хилл”-ийн байр суурь тодорхойгүй, гэхдээ...

Өнгөрсөн долоо хоногт УИХ-аас “Оюу Толгой” ордын ашиглалтад Монгол Улсын эрх ашгийг хангуулах тухай тогтоол баталсан ч төслийн голлох хөрөнгө оруулагч болох Туркойз Хилл компани албан ёсоор байр сууриа илэрхийлээгүй байна.

УИХ-ын тогтоол батлагдсанаас хойш Рио Тинто компанийн удирдлага хамтран ажиллана гэдгээ илэрхийлсэн ч гол хөрөнгө оруулагч  “Туркойз Хилл”-ийн зүгээс ямар нэгэн тайлбар хийгээгүй юм. Учир нь “Туркойз Хилл”-ийн ТУЗ-ийн гишүүд “Оюу Толгой” төслийг ашигтай төсөл гэж үзэхгүй байгаатай холбоотой аж. Төслийг хэрэгжүүлснээс хойш тус компанийн хувьцаа олон жилийн турш алдагдалтай айж энэ онд гэхэд хувьцааны өгөөж 70 хувиар буурсан. Дээрээс нь Монгол  Улсын Засгийн газартай ойлголцож чадахгүй байгаа нь төслийн цаашдын ирээдүйг бүрхэгдүүлж байгаа ажээ. 

Энэ сарын 21-ний өдөр хуралдсан УИХ-ын ээлжит хуралдаанаар Монголын талын 34 хувийг хувьцааг бүтээгдэхүүн хуваах нөхцөл эсхүл АМНАТ-т оруулах хувилбарыг судлан шийдвэрлэх талаар тусгасан юм. Харин “Туркойз Хилл”-ийн зүгээс үр ашиггүй байгаа энэ нөхцөлд дээрх заалтыг биелүүлэхэд амаргүй гэж тодорхойлж байна. Удахгүй Рио Тинто болон Туркойз Хилл энэ талаар албан ёсны шийдвэр гаргана. Гэхдээ эдийн засгийн онцлох шинжээчид биелэгдэх боломжгүй нөхцөл гэж дүгнэж буй.

“Туркойз Хилл”-н хөрөнгө оруулагчид “Оюу Толгой” төслийн далд уурхайн зардал нэмэгдсэн болон тухайн төслийн тухай мэдээллээр эрх тэгш хангадаггүй гэж шүүмжилж байсан удаатай. Энэ бол Рио Тинто компанитай холбоотой асуудал. Харин Монгол Улсын дэвшүүлсэн дээрх санал, санаачилгуудыг биелүүлэхэд хөрөнгө оруулагчдын ойлголцол хамгийн чухал. Ойлголцол тааруу байгаа үед бусад асуудлыг шийдвэрлэхэд хүндрэлтэй гэж ОХУ-ын “Alpha” санхүүгийн судалгааны байгууллагын шинжээчид томьёолжээ.