Юзүрү Ханюү 25 нас хүрлээ

Өнөөдөр Японы алдарт тамирчин Юзүрү Ханюү 25 нас хүрч байна.

Тэрбээр замналынхаа турш нийт 18 дэлхийн рекорд тогтоосон бөгөөд одоо уран гулгалтын эрэгтэйчүүдийн богино үзүүлбэрийн хамгийн их оноо авсан амжилтыг эзэмшиж байна.

Түүний замнал дандаа дардан шулуун байсангүй. 2011 онд Юзүрүгийн төрсөн хот Сэндайд хүчтэй газар хөдлөлт болж, гэр, бэлтгэлийн талбай нь нурж, бэлтгэл хийхэд хүндрэлтэй болсон билээ.

2012 онд 17 настай Ханюү Канадад дасгалжуулагч Брайан Орсерийн удирдлагад хичээллэх болж, алдар хүндийн оргилд гарсан.

Тэр “Сочи-2014”, “Пёнчан-2018” олимпын наадмын аварга. Түүнээс өмнө хамгийн сүүлд уран гулгалтад хоёр олимп дараалан түрүүлсэн нь 1948 оны Дик Баттон байлаа.

Ханюү дэлхийн хошой аварга, Гран При финалд дөрвөн удаа түрүүлсэн.

Хувь заяаны учралаар Ханюү 25 насны төрсөн өдрөө Италид Гран При финалын тэмцээнд угтлаа. Өнөөдөр тэр тус тэмцээнд тав дахь удаагаа түрүүлэх эсэхээ шийднэ.

Юзүрү спортын амжилтаас гадна зан аашаараа хүмүүсийн хайрыг татдаг.

Хэвлэлийн хурал дээр тэр өрсөлдөгч нараа магтаж, ахмад тамирчдадаа хүндэтгэл үзүүлэхээ хэзээ ч мартдаггүй.