МИАТ компани хар тамхины хэрэгт холбогдсон нисгэгч Д.Булганхангайг чөлөөлжээ

УИХ-ын гишүүн О.Баасанхүү оны өмнөхөн твиттер хуудсаараа дамжуулан МИАТ төрийн өмчит хувьцаат компанийн онгоцны нисгэгч хар тамхи хэрэглэсэн гэх мэдээллийг олон нийтэд өгсөн билээ.

Энэ мэдээллийн мөрөөр хэвлэл мэдээллийнхэн тодруулж, МИАТ компанийн нисгэгч Д.Булганхангай нь МИАТ-ийн B373 онгоцны хоёрдугаар нисгэгч бөгөөд хар тамхи хэрэглэсэн гэх хэрэгт нэр холбогдсон талаар мэдээлсэн.

Энэ асуудлаар МИАТ компаниас албан ёсны мэдээллийг өглөө.

МИАТ ТӨХК-ийн хэвлэлийн төлөөлөгч Б.Золжаргал “Тухайн хүн яг хар тамхи хэрэглэсэн эсэх нь тодорхой болоогүй. Хар тамхи хэрэглэсэн байж болзошгүй гэж таамаглаж, гомдол мэдээлэл өгсөн юм билээ. Түүнээс хэвлэл мэдээллийн байгууллагаар мэдээлж байгаа шиг нислэг үйлдэж байх үедээ хар тамхи хэрэглэсэн зүйл байхгүй. Тухайн үед нисгэгч амралттай байсан. МИАТ компанийн нисгэгч нь нислэг үйлдэх үедээ хар тамхи хэрэглэх ямар ч боломжгүй. Олон давхар хяналт, шалгалт давж байж нисгэгч нь нислэг үйлдэх зөвшөөрөл авдаг. Түүнийг хар тамхи хэрэглэсэн эсэх нь тогтоогдоогүй байхад хэрэглэсэн мэтээр дэвэргэсэн. Мөн УИХ-ын гишүүд улстөржүүлсэн ч зүйл анзаарагдлаа. Гэхдээ компанийн зүгээс асуудлыг нягтлах үүднээс Д.Булганхангайг ажлаас чөлөөлсөн байгаа” гэлээ.

Д.Булганхангай нь 2018 онд МИАТ компанийн зардлаар БНСУ-ын Сөүл хотод агаарын хөлгийн авран хамгаалах сургалтад хамрагдаж байсан гэх мэдээлэл бий.

Цагдаагийн байгууллагаас Д.Булганхангайд хэрэг үүсгэсэн эсэхийг тодруулахад, Монголын нутаг дэвсгэрт болсон үйл явдал биш учир шалгах нөхцөл үүсээгүй гэх тайлбар өгч байна.