ЛОЗАНН-2020: Норвегийн ихрүүд мөнгө, хүрэл медаль зүүлээ

“Таван цагариг”-ийн сурвалжлагч Э.Гуамарал Лозаннаас мэдээлж байна.

Швейцарын Лозанн хотноо болж буй залуучуудын Өвлийн III наадмын гүйлтийн цанын тэмцээн Vallee de Joux Cross Country Centre-d хоёр дахь өдрөө үргэлжилж байна.

Өнөөдөр (2020.01.19) гүйлтийн цанын спринт буюу ойрын зайн уралдаан явагдаж буй бөгөөд эмэгтэйчүүд 1,2 км (600 метрийн урттай замыг хоёр тойрог туулах), харин эрэгтэйчүүд 1,5 км ( 750 м х 2) замыг туулах ёстой.

Эмэгтэйчүүдийн спринтэд гараанаас 82 цаначин гарснаас манай тамирчин Б.Номин-Эрдэнэ 3 минут 18.09 секундийн амжилтаар 60 дугаар байр, Д.Урангоо 3 мин 27.22 сек амжилтаар 67 дүгээр байрт тус тус орлоо.

Энэ зайд Швейцарын Ш.Вигген 2:46.40 амжилтаар алт, Норвегийн А.Хегген 2:47.87 амжилтаар мөнгө, Шведийн М.Русенберг 2:48.92 амжилтаар хүрэл медаль хүртлээ. Ш.Вигген өчигдөр 1,8 км-ийн чөлөөт уралдаанд мөн алтан медаль, М.Русенберг мөнгөн медаль хүртэж байсан билээ.

Эрэгтэйчүүдийн спринтэд 86 тамирчин гараанаас гарч манай цаначин О.Золбаяр 3:44.37 амжилтаар 61 дүгээр, Б.Хонгор 4:02.06 амжилт үзүүлж 74 дүгээр байрт орлоо.

Эрэгтэйчүүдийн спринтийн алтан медалийг Шведийн Э.Ангер 3:10.47 амжилтаар хүртсэн бол мөнгө, хүрэл медалийг Норвегийн ихрүүд Николай Холмбю, Александр Холмбю нар 3:10.97 болон 3:15.51 амжилтаар хүртлээ. Өчигдөр болсон 1,8 км-ийн уралдаанд Николай Холмбю алт, Э.Ангер мөнгөн медаль хүртэж байсан юм.

Дашрамд дурдахад манай цаначин хоёр охин хоёулаа дөнгөж 15 настай бол Б.Хонгор 16, О.Золбаяр 17 настай юм.

Гүйлтийн цанын тэмцээн нэгдүгээр сарын 21-нд эмэгтэй 5 км, эрэгтэй 10 км -ийн зайн классик төрлөөр үргэлжлэн явагдах бөгөөд манай дөрвөн цаначин мөн хурд сорих юм.

Гэрэл зургийг OIS/ Chloe Knott, Joel Marklund