МИАТ-ийн маргаашийн нислэгт ӨӨРЧЛӨЛТ оржээ

ОХУ, Украин Улсын хооронд үүсээд буй нөхцөл байдалтай холбоотойгоор Европын Холбооны Улс болон Англи Улсаас авч хэрэгжүүлж буй хориг арга хэмжээний хүрээнд ОХУ-ын нутаг дэвсгэр дээгүүр нислэг үйлдэж буй аливаа агаарын хөлгүүдэд давхар даатгал үйлчлэхгүй болсон тухай мэдээлсэн. Үүнтэй холбоотойгоор МИАТ ТӨХК-аас маргааш буюу гуравдугаар сарын 5-нд Европ руу хийх нислэгтээ өөрчлөлт оруулжээ. 

Тодруулбал, МИАТ ТӨХК-ийн агаарын хөлгүүд нь Англи Улсын компанид давхар даатгалтай байдаг тул Европын чиглэлийн нислэгүүдийнхээ аюулгүй байдал, аюулгүй ажиллагааг маш өндөр түвшинд хангах зорилгоор гуравдугаар сарын 5-ны өдрийн ОМ137/ОМ138 дугаарт Улаанбаатар – Москва – Франкфурт – Москва – Улаанбаатар чиглэлийн зорчигч тээврийн нислэгийн маршрутад өөрчлөлт оруулан Улаанбаатар – Бишкек – Истанбул – Франкфурт – Истанбул – Бишкек – Улаанбаатар чиглэлээр нислэг үйлдэхээр төлөвлөн ажиллаж байна.

Олон улсын агаарын тээврийн аюулгүй байдлын дүрэм, журмын дагуу зорчигч болон ачаа тээврийн нислэг үйлдэж буй аливаа агаарын хөлгүүд нь заавал давхар даатгалд хамрагдсан байх ёстой. 

Европын чиглэлийн нислэгүүдийн замд ийнхүү өөрчлөлт орсноор,
 

• Нислэгийн үргэлжлэх хугацаа нэг талдаа 3 цаг 10 минутаар нэмэгдэнэ
   
• Нислэгийн цагийн хуваарь: 2022 оны гуравдугаар сарын 5-ны өдрийн Улаанбаатрын цагаар 06:30-д хөөрч, орон нутгийн цагаар 3 дугаар сарын 5-ны өдрийн 13:50 цагт Франкфурт хотын ОУНБ-д бууна.
   
• Тийзний үнэд өөрчлөлт орохгүй.