Улаан талбайд 11 МЯНГАН цэрэг, орчин үеийн ТЕХНИКИЙН ЦУВАА жагсана

Аугаа эх орны дайны ялалтын 77 жилийн ойн баярын жагсаал Кремлийн хонх 10:00 цагийг цохиход эхэлнэ.

Улаан талбайд болох Ялалтын баярын жагсаалыг ОХУ-ын Батлан хамгаалахын сайд Сергей Шойгу хүлээн авсны дараа Москвагийн цагаар 10:15-д ОХУ-ын Ерөнхийлөгч Владимир Путин үг хэлнэ.

ОХУ-ын Төрийн тэргүүн үг хэлсний дараа Москва хотын төвөөр Оросын Зэвсэгт хүчний бүх анги, салбарын 11 мянган цэрэг алхах юм. Цэргийн техникийн цувааны тэргүүнд “Т-34-85” танк гарч ирж, араас нь явган цэргийн машины орчин үеийн загварууд явах аж.

Ялалтын баярын жагсаалын агаарын хэсгийг цэргийн нисдэг тэрэгнүүд эхлүүлж, дэлхийн хамгийн том нисдэг тэрэг “Ми-26” Москвагийн тэнгэрт хөөрнө. Түүний араас стратегийн пуужин тээвэрлэгч, бөмбөгдөгч, сөнөөгч онгоцууд, Кинжал пуужинг харвах зориулалттай “МиГ-31И” онгоцны тусгай загвар нисэх аж.

Москвагийн тэнгэрт мөн “Су-24МР” болон “МиГ-29” онгоц хөөрч, Донбассыг хамгаалах тусгай ажиллагааны бэлгэ тэмдэг Z-г дүрслэх гэнэ. Хамгийн сүүлд уламжлалт ёсоор “Су-25” довтлогч онгоцууд тэнгэрт ОХУ-ын төрийн далбааны өнгийг зурна.

Улаан талбайд болох баярын жагсаалын дараа Москва болон бусад хотод баярын концертууд болж, 15:00 цагт “Мөхөшгүй хороо” ахмад дайчдын дурсгалыг хүндэтгэх арга хэмжээ болно. Харин 22:00 цагт ёслолын буудлага болох аж.