Хоккей: Канадын шигшээ анх удаагаа Данид ялагдлаа

Финландад хоккейн дэлхийн аварга шалгаруулах тэмцээн үргэлжлэн явагдаж байна. Өчигдөр болсон хэсгийн тоглолтод Данийн шигшээ баг хоккейн эх орон Канадын багийг 3:2 ялж, шуугиан тарилаа. Тэд анх удаагаа канадчуудыг ялж байгаа нь энэ юм.

Тус хоёр баг өмнө нь ДАШТ-д хоорондоо 7 удаа таарснаас канадчууд зургаа ялж, нэг удаа 2:2 тэнцэж байв. Долоон тоглолтын гоолын харьцаа 77:11 байлаа. Хамгийн анхны тоглолт 1949 онд болж, Канадын баг 47:0 ялж байв.

Канадын багийг ялснаар Данийн шигшээ А хэсэгт 12 оноотой, 3-р байрт явж байна. Харин Канадын шигшээ дөрөвдүгээр байрт ухарчээ.

Канад – Дани 2 : 3

0:1 Лауридсен (Асперуп, Поульсен) – 09:11 (5x5)   0:2 Регин (Сторм) – 14:54 (4x5)   1:2 Комтуа (Лаури) – 22:33 (5x5)   1:3 Бау (Элерс, Сторм) – 52:11 (5x4)   2:3 Грейвз (Сиверсон, Дюбуа) – 56:09 (5x5)