ӨВӨРХАНГАЙ: Дифлимпийн анхны аваргадаа хүндэтгэл үзүүллээ

Өвөрхангай аймгийн удирдлагууд өнөөдөр /2022.05.24/ Дифлимпийн чөлөөт бөхийн анхны аварга, алтан медальт Н.Эрхэмбаярыг угтан авч, хүндэтгэл үзүүллээ.

Сонсголын бэрхшээлтэй иргэдийн спортын зуны XXIV олимпийн наадам Бразилын Кашиас-ду-Сул хотод тавдугаар сарын 1-нээс 15-ны өдрүүдэд болсон. Дөрвөн жил тутамд нэг удаа болдог,  24 дэх удаагийн энэхүү наадамд 73 орны 2400 тамирчин оролцсон бөгөөд Монгол Улсаас найман тамирчин өрсөлдсөн.

Харин чөлөөт бөхийн төрөлд Өвөрхангай аймгийн БТСГ-ын дасгалжуулагч, спортын мастер Э.Баттүшигийн удирдлага дор манай улсаас 3 тамирчин оролцсон юм. Тэднээс "Самсун-2017" дифлимпийн мөнгөн медальт, дифийн өсвөр үе, залуучуудын дэлхийн аварга, Намдагдоржийн Эрхэмбаяр 65 кг жинд алтан медаль хүртэж Монгол Улсын алтан соёмбот далбаагаа мандуулж, төрийн дууллаа эгшиглүүсэн билээ.