Хөгжлийг гацаасан “Хорлон сүйтгэгчид”-ийг шалгуулна

Засгийн газар лхагва гаригт /2022.08.03/ ээлжит хуралдаанаа хийлээ. Улсын хилийн зурваст газар ашиглуулах тухай Засгийн газрын тогтоолын төсөл, Эрдэнэт, Оюутолгойн ордыг иж бүрэн ашиглах, зэсийн боловсруулалтыг нэмэгдүүлэх төслүүдийг хэлэлцсэн байна. Ерөнхий сайд Л.Оюун-Эрдэнэ энэ үеэр   танхимын  гишүүддээ  хэд хэдэн чиглэлээр үүрэг өгчээ.

Мөн хяналт шалгалтын ажлын хэсэг байгуулж ажиллахад анхаарахыг БШУ, ХЗДХ, Сангийн сайд нарт даалгажээ. Нэн тэргүүнд  хичээлийн шинэ жил эхлэх гэж байгаатай холбоотой  боловсролын салбар дахь авлигын асуудлыг таслан зогсоох, хяналт тавих чиг үүрэг бүхий ажлын хэсгийг 11-11 төв дээр өргөтгөсөн байдлаар зохион байгуулах чиглэл өгсөн байна.

Зарим сургуулийн удирдлага хамран сургах тойргийн бус, харьяаллын бус хүүхдүүдийг хувийн ашиг сонирхлын үүднээс сургадаг,  хүүхдүүдийг ямар ч шалгуургүй элсүүлдэг. Иймд энэ  явдлыг таслан зогсоох Ажлын хэсэг  байгуулж,  бүрэлдэхүүнд  нь АТГ, ЦЕГ, ТЕГ, БШУЯ, нийслэлийн Боловсролын газар зэрэг мэргэжлийн байгууллагын төлөөллийг оролцуулахыг үүрэг болгожээ. Харин нийслэлийн цэцэрлэгийн хүртээмжийг нэмэгдүүлэх талаар авч хэрэгжүүлж буй цогц арга хэмжээний талаар зарим шийдвэрийг гаргасан байна.

Олон нийтийн анхаарлыг татаж буй нэг шийдвэр нь Монгол Улсын стратегийн салбарын бүтээн байгуулалтыг санаатайгаар зогсоож, хорлон сүйтгэх үйл ажиллагаа явуулсан үйлдлүүдийг хууль хяналтын байгууллагаар шалгуулах, алдагдсан боломжийн өртгийг нэхэмжлэх чиг үүрэг бүхий Ажлын хэсгийг байгуулжээ.  Манай улс сүүлийн 20 гаруй жил  стратегийн салбартаа  бүтээн байгуулалт хийж  чадаагүй. Тухайлбал,  Эрдэнэбүрэнгийн УЦС-ийг тухайн сумын ИТХ-ын дарга  нь БНХАУ руу  бичиг явуулж, хоёр  жил тойрон  тасалдуулсан. Үүнийг Эрүүгийн хуульд заасан "Хорлон сүйтгэх ажиллагаа" зүйлчлэлээр хууль хяналтын байгууллагад өгч шалгуул гэжээ.

Түүнчлэн цахим гэмт хэргийн гаралт  нэмэгдэж байгааг анхааруулж,  энэ төрлийн гэмт хэргийг таслан зогсоох, үүний эсрэг хөтөлбөр гаргаж танилцуулах Ажлын хэсгийг яаравчлан  байгуулжээ.  Засгийн газрын хуралдааны дараа Сангийн сайд Б.Жавхлан, ХЗДХ-ийн сайд Б.Нямбаатар нар мэдээлэл хийсэн юм.

Б.ЖАВХЛАН: Монгол Улс дефолтод орохгүй

-Манай улс  2012 оноос хойш нийт долоон бонд гаргасан. 2012 оны арванхоёрдугаар сард "Чингис" бонд 1.5 тэрбум ам.доллар, 2015 оны зургадугаар сар "Дим Сам" бонд, 2016 онд "Мазаалай" бонд гарч нийт 2.2 тэрбум ам.долларын бонд гаргасан. Түүнээс хойш "Хуралдай", "Гэрэгэ", "Номад", "Century" бонд гээд дөрвөн бонд гарсан. Үүнээс зөвхөн нэг бондоор нь  төсөл, арга хэмжээнүүдийг санхүүжүүлсэн байдаг.

Түүнээс хойш  гарсан бонд төсвийн алдагдлыг нөхөх, өмнөх бондын зээлийг төлөхөд зарцуулагдсан.  Сүүлийн үед гарч буй мэдээлэлтэй холбогдуулж хэлэхэд,  Монгол Улс ойрын гурван жилдээ  дефолтод орохгүй. 2012-2016 онд АН засаг барьж  төсөл, арга хэмжээнүүдийг санхүүжүүлсэн. 2016 оноос хойш МАН засаглаж,  өрийг өрөөр төлж эхэлсэн. Учир нь бондын өрийг төлөх  валютын нөөц байгаагүй. Тухайн үед өр тавьсан хүмүүс одоо дефолт болох нь  гээд алга ташаад явж байна. Гэтэл  Засгийн газар хамгийн хүнд ачааг  үүрч байгаа. Бондын зарцуулалтыг шалгах Ажлын хэсэг ирэх долоо хоногт   шалгалтын дүнг танилцуулна.

Х.НЯМБААТАР: ЕБС-иуд дахь  авлигыг зогсооно

Монгол Улсын Засгийн газар, Боловсрол шинжлэх ухааны яам хүүхэд, залууст  тэгш боловсрол олгох бодлогыг  баримталж ирсэн. Энэ хүрээнд  ялангуяа сургуулийн өмнөх болон ерөнхий боловсролын сургуулийн хүүхдүүдийг хамран сургах тойргоор суралцуулах асуудалд салбарын яам нь  анхаарал хандуулан ажилладаг.  Өнөөдөр  Засгийн газрын ээлжит хуралдаанаар  хичээлийн шинэ жил эхлэхтэй холбогдуулан боловсролын салбар дахь авлигыг таслан зогсоох, хяналт тавих чиг үүрэг бүхий Ажлын хэсэг байгуулахаар боллоо.

Улаанбаатар хотын хэмжээнд  тойргийн бус хүүхдүүдийг сургуулийн захирал, цэцэрлэгийн эрхлэгч нар ашиг сонирхлын үүднээс элсүүлэн сургадаг.  Тэр дотор нэр хүнд бүхий сургуульд хүүхдүүдийг шалгуургүй элсүүлэн авдаг явдал байсаар байна. Энэ  байдлыг таслан зогсооно. Боловсролын салбар дахь авлигыг таслан зогсоох  үүрэг чиглэл бүхий Ажлын хэсэг байгуулсан.  Боловсрол шинжлэх ухааны яам, Нийслэлийн боловсролын газар болон АТГ, ТЕГ, ЦЕГ зэрэг хууль, хүчний  байгууллагын  төлөөлөл Ажлын хэсгийн  бүрэлдэхүүнд  багтсан. Иймд Засгийн газрын хэрэгжүүлж буй энэ бодлогыг сургууль, цэцэрлэгийн эрхлэгч нар дэмжиж хэрэгжүүлэхийг  үүрэг болгоод байна. Бид дунд болон доод шатанд буй авлигыг таслан зогсоохын төлөө ажиллах болно.

Ч.ЗОТОЛ

Эх сурвалж: Өглөөний сонин