"Нийслэлд АГААРЫН БОХИРДОЛ БАГА байгаа"

Агаарын бохирдол, шахмал түлшний чанартай холбоотой асуудлаар Орчны бохирдлыг бууруулах үндэсний хороо, "Ус, цаг уур, орчны шинжилгээний газар"-аас мэдээлэл хийлээ. /2023.01.02/

Цаг уур, орчны шинжилгээний газрын хэлтсийн  дарга Ж.Батбаяр: 

-Сүүлийн хоёр хоног Улаанбаатар хотод агаарын бохирдол нэмэгдсэн мэт дүр зураг та бүхэнд мэдрэгдсэн байх.

Бид аливаа үйл ажиллагаа явуулах, дулааны энерги авах нь агаарын бохирдол бий болох эх үүсвэр болдог. Тодруулбал, Дулааны цахилгаан станцаас авч буй эрчим хүчний эх үүсвэр, гэр хорооллын яндан, авто тээврийн хэрэгсэл, газрын гадаргын тоосонцор зэрэг нь Улаанбаатар хотод агаарын бохирдол үүсэх гол шалтгаанууд болдог. 

Хүйтний улирал эхэлсэн аравдугаар сараас агаарын чанар бохирдлын түвшин бага байсан. Гэтэл сая ес эхэлснээс хойш дулааны эрчим хүч илүү их шаардаж, энэ хэрээр агаарын бохирдол нэмэгдсэн. 

Дээрээс нь энэ их даралтын оронд буй Улаанбаатар хотын хонхорхойд хүйтэн агаарын массын тунарал үүсэх процесс явагддаг. Өөрөөр хэлбэл, газрын гадаргаас дээш 100 метр тутамд 0.06 хэмээр буурч байдаг процесс эсрэгээрээ газрын гадаргадаа хүйтэн, дээд мандалд тодорхой түвшинд хүйтэн агаарын масс гараад ирэхээр газрын гадаргад буй хүйтэн агаарын масс дээр бидний ялгаруулсан агаар мандлын бохирдуулагчид хүнд агаарын масс дотор тунараад, Улаанбаатар хотын хонхорхойд агаарын бохирдлын бөөгнөрөл, өтгөрөл бий болсон.

Энэ нь динамик хөдөлгөөнийхөө процессоор Улаанбаатар хотын газар зүйн нөлөөллийн, тухайлбал, уулын ам, хөндий, хотгор гүдгэрийн орчинд янз бүрийн төлөв байдалтайгаар оршин тогтнох нөхцөл байдал бүрэлддэг процесс сүүлийн хоёр хоногт болсон. Бидний бохирдуулагч ялгаруулж буй үйлдвэрийн, гэр хорооллын ялгарал дээр нэмэгдэл байгаль цаг уурын хүчин зүйл үйлчилж байгаа гэсэн үг. Үүнийг бид байгаль цаг уурын хүчин зүйлээр, агаарын бохирдлын, хүний үйл ажиллагаанаас үүдэлтэй ялгарлыг үгүйсгэж байгаа, энэ утгаар тайлбарлах гэж байгаа оролдлого биш. Сүүлийн хоёр хоногт агаарын бохирдол хамгийн их, агууламж өндөр байлаа.

Тоон утгаар тайлбарлая.

Агаарын бохирдлын агууламжийг бид өнгөрсөн өнгөрсөн оны мөн үетэй харьцуулахад хүхэрлэг хий 658 микрометркубээс 660 болж 2 микрокубээр нэмэгдсэн байна. Тэгэхээр хүхэрлэг хийн хэмжээ асар бага нэмэгдсэн буюу өнгөрсөн оны түвшинд байсан гэж хэлж болно. Азотын давхар исэл 170 мкубээс 177 болсон байна. Энэ мөн л төдийлөн нэмэгдээгүй үзүүлэлт. Бид агаарын бохирдлыг хэмжихдээ олон улсад хэрэглэгддэг, минут секундээр тасралтгүй хэмждэг багаж ашигладаг. Тиймээс бид итгэхээс өөр арга байхгүй.

Тоон мэдээллээс харахад, Улаанбаатар хотын нийт агаарын бохирдол бага түвшинд байгаа. Сүүлийн өдрүүдэд цаг агаарын нөхцөл байдал нөлөөлж агаарын бохирдол өтгөрсөн, харанхуйлсан байдлаар харагдаж байгаа юм.

Уулын ам, хөндий, газрын гадаргын өндөр, нам зэргээс хамаарсан цаг хугацааны тасралтгүй орон зайн хувьсал хөдөлгөөний үед агаарын бохирдол янз бүрийн хэлбэрээр өтгөрсөн, харанхуйлсан, тунарсан харагддаг. Энэ бол оптик шинж чанараар ажиглаж байгаа хэлбэр.