“Наад Гарначогоо цохиод аваач!”

Алехандро Гарначо гэх аргентин жигүүрийн хагас хамгаалагч Английн “Манчестер Юнайтед”-д байдаг.

Европа лигийн финалын гараанд өөрийг нь гаргасангүй гээд гомдол мэдүүлсэн шинжтэй ярилцлага өгсөн 20 настай энэ залуу хэдхэн хоногийн өмнө сошиал хаягтаа “Астон Вилла”-гийн өмсгөлтэй яваа зураг оруулсан юм. Яахав өмсгөл дээр нь Маркус Рэшфордын нэр байх нь байлаа. Гэхдээ л “Юнайтед”-д данстай хэрнээ нэг лигийн өөр багийн өмсгөл өмссөн нь “Улаан чөтгөрүүд”-ийн фанатуудын дургүйцлийг төрүүлсэн, өдөөн хатгасан маягтай пост болсон.

Зарим хэвлэлийн мэдээлснээр бол “Манчестер Юнайтед”-ын дасгалжуулагч Рубен Аморим багаасаа Маркус Рэшфордыг ч, Алехандро Гарначог энэ зун явуулчих санаатай байгаа гэдэг. Сэтгэл зүрхээ зориулж, өөрийгөө дайчилж тоглож чадахгүй бол багт хэрэггүй гэсэн шиг билээ.

Тиймээс ч Европа лигийн финалын дараагаар хувцасны өрөөнд Гарначод “Энэ зун өөр баг олдоосой гэж залбираарай, чи” гэж хүртэл загнасан сураг дуулдсан.

Тэгвэл “Уотфорд”-ын ахлагч асан Трой Дини энэ сэдвээр бодлоо хэлжээ.

“Энэ байдлыг нь харвал “Юнайтед”-д эргэж очихыг хүсэхгүй байгаа шинжтэй. Хаа нэг тийшээ явах гэж байгаа юм байлгүй. Тэгээд л ингэж байхгүй юу.

Шинэ үеийн залуус ер нь нэг иймэрхүү. Би хөгшин чоно шиг улиад байхыг хүсэхгүй ч ийм залуусыг харахаар дагз руу нь цохиод авмаар санагдах юм. Яасан уйддаг юм уу, яадаг юм. Хүндлэл гэж огт мэдэхгүй. Нэг л их гомдсон, тунирхсан жаалууд.

Би Бруно Фернандеш шиг багийнх нь ахлагч байсан бол амралтаас бэлтгэлдээ ирмэгц нь цохиод унагана. Тэгээд “Чи өөрийгөө хэн гэж санаа вэ, ***** минь! Энэ чинь “Манчестер Юнайтед! Өчүүхэн хоосон толгойт минь” гэж хэлэх байлаа” хэмээн Трой Дини өгүүлжээ.

Ганц Гарначо ч биш “Юнайтед”-д Маркус Рэшфорд, Жэйдон Санчо, Антони нарын зэрэг үлдэж тоглох хүсэлгүй, өөр тийш явахыг л мөрөөдсөн хэд хэдэн залуу хөлбөмбөгч хөглөрч буй билээ.