Сэлэнгийн наадмын түрүүг МҮБХ хүчингүйд тооцов

Сэлэнгэ аймгийн наадмын үзүүр түрүүнд аймгийн заан Э.Алтанбаяр, Дорнод аймгийн Баянтүмэнгийн уугуул, аймгийн заан Э.Төмөрсүхтэй барилдахдаа араас нь дайрч барьц аваад давсан барилдаан болсон тухай өмнө мэдээлсэн. Тэгвэл энэ барилдааныг дүрэм зөрчсөн хэмээн үзэж, авсан цолыг хүчингүйд тооцохоо МҮБХ мэдээллээ.

"МҮБХ-ны МЭДЭГДЭЛ - ДҮРМИЙН БУС БАРИЛДААН!!!

Сэлэнгэ аймгийн баяр наадмын үзүүр, түрүүний барилдаан "Үндэсний их баяр наадмын үндэсний бөхийн барилдааны дүрэм"-ийн 4.6.6-д "Засуул барилдааныг түр зогсоох үед, эсхүл учраагаа өмсгөлөө засаж байхад болон барилдаан удааширсан үед барьц бариулж байхад мэх хийж унагах тохиолдолд дахин барилдуулна" гэсэн заалтыг зөрчсөн барилдаан болсон байна.

Иймд дээрх бөхийн (Сэлэнгэ аймгийн Алтанбулаг сумын уугуул, аймгийн заан Э.Алтанбаяр) барилдааны үр дүн буюу шинээр цол авсан дээрх бөхийн цолыг Үндэсний их баяр наадмын тухай хууль, Бөхийн барилдааны дүрэмд заасны дагуу Аймаг, цэргийн цолтны эрэмбэд тооцохгүй болно.

Жич: Уг барилдаантай төстэй барилдаан 2021 онд зохион байгуулсан 512 бөхийн барилдааны тавын даваанд болж, Хөлийн цэцүүд хоёр бөхийг дахин барилдуулахаар шийдвэрлэсэн боловч өвдөг шороодсон бөх татгалзаж байсан болно" хэмээн МҮБХ мэдээлсэн байна.

Засуул барилдааныг зогсоосон үед Э.Алтанбаяр өрсөлдөгчийнхөө араас дайрч барьц авч давсан гэж үзжээ.