Ламин Ямалийг том од шиг аашлахгүй байхыг анхааруулав

Европын Аваргуудын лигийн хэсгийн хоёрдугаар тойрогт Испанийн “Барселона” талбайдаа Францын “Парис Сэн-Жэрмэйн”-ийг хүлээн авч, 1:2-оор хожигдсон.

Өнгөрсөн улирлын Аваргуудын лигийн аварга “Парис Сэн-Жэрмэйн”-ий бүрэлдэхүүyд “Алтан бөмбөг” дөнгөж гардаад буй Усман Дембеле гэмтлийн улмаас байсангүй. Мөн багийн ахлагч Маркиньос, залуу авъяаслаг тоглогч Жоао Невеш, Дэзирэ Дүэ болон гүрж жигүүрийн хагас хамгаалагч Хвича Кварацхелиа ч мөн гэмтлээс болоод тоглосонгүй. Гэлээ ч “Барселона”-г талбайд нь хожсон юм.

Ханси Фликийн баг нэгдүгээр тойрогт Английн “Ньюкасл”-ыг Маркус Рэшфордын хоёр гоолоор 0:2-оор хожсон тоглолтод Ламин Ямаль оролцоогүй. Түүнийг гэмтэлтэй гэж мэдээлсэн. Харин “ПСЖ”-ийн эсрэг тоглолтод гарлаа.

Гэхдээ дуугүй ч гарсангүй. “Би эргээд ирлээ. Надтай хамт миний эрхэм зорилго мөн ирлээ” хэмээн тоглолтын өмнө сошиалд бичсэн байлаа. Гэвч эрхэм зорилго нь энэ удаад бүтсэнгүй. Хоёр баг төгсгөл хүртэл 1:1-ээр тэнцэж яваад португал довтлогч Гонсало Рамуш хожлын гоолыг оруулснаар гурван оноотой буцсан. Хожигдсоныхоо дараа Ямаль “Эрхэм зорилго”-ын тухай постоо устгасан ч “Барселона”-гийн Педригийн мөн л тоглолтын өмнө сошиалд ““Барселона” бол Европын хамгийн шилдэг баг” гэж бичсэн нь олны ярианы сэдэв болж хувирсан байна. Аваргуудын лигт “Парис Сэн-Жэрмэйн” түрүүлсэн атал өөрсдийгөө шилдэг нь гэсэн, тэгтэл нэмээд хожигдчихсон тул Испанийн хэвлэлүүд ч дуугүй байж сурахыг анхааруулжээ.

“Бид Аваргуудын лигийн аваргууд. Миний хэлэх гэсэн юм ердөө л энэ. Хэрвээ чи үнэхээр шилдэг нь юм бол түүнийгээ талбай дээр л харуулах ёстойгоос биш хий дэмий чалчих хэрэггүй” гэж Гонсало Рамуш өгүүлжээ.

Испанийн хэвлэлүүд Ламин Ямалийг сошиалоор “чалчиж” байхын оронд бэлтгэлдээ илүү анхаарахыг сануулж, анхааруулж эхэлсэн байна. “Алтан бөмбөг”-ийн санал хураалтад хоёрдугаар байр эзэлсэн ч гэлээ тэр шагналыг гардаагүй болохоор өөрийгөө том од гэж бодох хэрэггүй. Хэдийгээр насандаа баймгүй хэрсүү сайн тоглодог ч урьдын адил томоогүй, хөнгөн хийсвэр өсвөр насны хөвгүүн хэвээр байсаар байгааг нь ч анхааруулжээ.

“Ямаль эхний үед бөмбөг хуваарилж, дамжуулалтууд өгч сайн тоглосон. Бүр маргааш болохгүй юм шиг өнөөдөр л бүхнийг амжуулах гэж зүтгэх мэт тоглосон. Харин хоёрдугаар үед тоглолт нь уначихсан. Ямар ч сэдэл санаагүйгээр муу тоглолоо. “Алтан бөмбөг” гардахыг хүсээд байгаа юм бол өөр олон зүйлээ сайжруулах хэрэгтэй нь илт байна” хэмээн AS шүүмжилжээ.