ҮАБЗ-аас гадаад паспорт хэвлэх ажилд Б.Батцэцэг сайдын хамаарал бүхий компанийг шалгаруул гэсэн чиг иржээ

Гадаад паспорт хэвлэдэг “Төрийн үнэт цаас хэвлэл” ТӨОХХК-ийн 51 хувийг УБЕГ, 49 хувийг Б.Батцэцэг сайдын хамаарал бүхий "Мигасон” компани эзэмшдэг.

Засгийн газраас гадаад паспортыг эх орондоо хэвлэх чиглэл гарч, гадаад паспорт хэвлэх компанийг сонгон шалгаруулах нээлттэй тендэрийг анх зарласан байдаг. Гадаад паспорт хэвлэх тендэрт нэгэн компани ороод явж байтал Үндэсний аюулгүй байдлын зөвлөлөөс “Зөвхөн нэр заасан энэ компанитай шууд гэрээ байгуулж гадаад паспорт хэвлэх ёстой” гэсэн бичиг иржээ. Ингээд Үндэсний аюулгүй байдлын зөвлөлөөс ирүүлсэн “нууц”-ын тамгатай энэ бичгийн дагуу Гадаад харилцааны сайд Б.Батцэцэгийн хамаарал бүхий “Мигасон” компани ямар ч тендэргүй, сонгон шалгаруулалтгүйгээр дангаар хэвлэж эхэлжээ.