Н.Алтанхуяг: Намайг огцруулах кноп дарсан Ардчилсан намынхаа гишүүдэд би огт гомддоггүй

Монгол Улсын Ерөнхий сайд асан Н.Алтанхуяг ирэх жил болох “Ерөнхийлөгчийн сонгуульд өрсөлдөнө” гэдгээ олон нийтэд мэдээлсэн билээ. Түүний энэхүү мэдэгдэл олны анхаарлыг нэлээд татаад байгаа бөгөөд өнөөдөр "Монгол" телевизийн “Хар хайрцаг” нэвтрүүлэгт оролцож, өөрийн улс төрийн санаа бодол, Засгийн газрын тэргүүн байхдаа яг юуг хийсэн гэх мэт олон асуудлын хүрээнд ярилцсан байна. Түүний ярилцлагын онцлох хэсгүүдийг ишлэл болгон дор нийтэллээ.

• Сонгуульд өрсөлдөнө гэдэг олон нийтэд таалагдах, гоё мөртлөө худал үг хэлэхийг хэлдэггүй юм гэдгийг би ойлгосон...

• Намайг огцруулах кноп дарсан Ардчилсан намынхаа гишүүдэд би огт гомддоггүй, ямар ч асуудал байхгүй...

• Улс төрийг дэмий чалчдаг, худлаа бие биенийгээ гүтгэдэг талбар болгочихлоо.

• Шүүмжлэл шиг чухал зүйл байхгүй. Хүн ч бай, засаг ч бай шүүмжлэхээ боливол уруудна гэсэн үг.

• Аль ч засаг хэлэхээ хэлдэг, авахаа авдаг тогтолцоо руу шилжих ёстой.

• Ардчилсан намынхан тийм муу хүмүүс биш. Манай намынхан эрх чөлөөт байдлыг эрхэмлэдэг, хэлэх гэснээ хэлж чаддаг нээлттэй хүмүүс.

• Манай нам муу байсан бол би хэзээ ч зургаан жил дарга хийж чадахгүй.

• Н.Алтанхуягийн Засгийн газрыг огцруулах асуудал, давхар дээлтнүүдийг орж ирсэн цагаас эхэлсэн...

• Улсын Их Хурлын гишүүн сүрдүүлгээс болоод кнопоо дарж чаддаггүй юм байна гэдгийг би Байнгийн хороон дээр харсан. Уг нь ард түмнээр сонгогдож ирсэн гишүүний, кноп дарах эрхэнд халдаж болохгүй гэж би олон ярьсан.

• Өнгөрөгч хоёр жилд хоёр зүйл их буруу болж тогтсон. Нэгдүгээрт, өөрийнх нь төлөө явдаггүй хүмүүсийг золигт гаргах, хоёрдугаарт гишүүний кноп барьцаанд орох...

• Би маш олон удаа Монгол Улсыг хэн удирдаж байгаа юм гэж асууж байсан. 

• Ерөнхий сайд болохоор л жаргалын оронд оччихдог юм биш. 

• Дэлхий дээр байгаа бүх зүйлийг үйлдвэрлэнэ гэж дэмий яриад яахав. Монголдоо үйлдвэрлэж болохоор зүйлүүдийг хийх л ёстой.

• Н.Алтанхуяг гэдэг хүн зөрүүд бус харин ч зөөлөн.

• Би суудал боддог хүн биш. Би өөрийн гэсэн зарчимтай болохоос баялгаа худалдаж иддэг хүн биш.

Эх сурвалж: "Монгол HD" телевизийн "Хар хайрцаг" нэвтрүүлэг. 

Бэлтгэсэн: О.Туяа