Хайртайгаа учраагүй яваа хаад, гүнжүүд

Ханхүү Уильям, харц ард Кэтрин Миддлтон нарын хурим атаач заримын нулимсыг урсгасан. Үүний зэрэгцээ одоо болтол хайртайгаа учраагүй яваа хаад, гүнж нар ч байна.

Бутаны хаан Жигме

Луут угсааны тав дахь хаан Жигме Кхесар Намгьял Вангчук 2006 онд эцэг нь сайн дураар татгалзсаны дараа хаан ширээнд заларчээ. Вангчук эх орондоо боловсрол  эзэмшиж,  АНУ,  Их Британийн коллежид сурч, улмаар улс төр судлалаар Оксфордын  докторын зэрэг хамгаалсан аж. Чухам Жигме хааны ачаар хэмжээлшгүй эрхт хаант засаглалтай Бутан улс Үндсэн хуультай хаантай болсон юм. 31 настай Жигме бол дэлхийн хамгийн залуу хаан бөгөөд гоонь эр. Учир нь нэр төрийн албанд хамаг цагаа зарцуулдгаас эхнэр авах завгүй яваа аж. Тэгээд ч хаан түр зуурын амрагийн явдал хөөдөггүй гэнэ.

Свазилэндийн гүнж

23 настай гүнж Сиханизо Дламини бол Свазилэнд улсын хаан III Мсватийн 24 хүүхдийн хамгийн том нь. Тэрбээр Европын сургууль төгсч, Лос-Анжелосын “Biola” их сургуульд тайзны урлагийг судалжээ. Гэвч гүнж гадаадад тансаг амьдрал хийх

болжээ. Яагаад гэвэл энэ улс ДОХ-той хүмүүсийнхээ тоогоор дэлхийд тэргүүлдэг аж. Тэр бүү хэл, гүнж аавынхаа уур хилэнгээс айлгүйгээр эцгиин эрхт ёс болон хуучинсаг бүхний эсрэг тэмцдэг. Улс төрөөр оролдоогүй үедээ рэп дуу зохиох дуртай. Гэхдээ гүнж хатан хааны титэмтэй цуг ДОХ, ажилгүйдэл, хүүхдийн нас баралт гээд олон асуудлыг өвлөн авах аж.

Уэльсийн ханхүү Харри

26 настай Генри (Харри) Чарльз Альберт Дэвид бол Английн хаан ширээ залгамжлах эрхтэй гурав дахь хүн. Тэрбээр Итоны коллеж, Сэндхерст дэх Хааны цэргийн академийг төгсөж, хоёрдугаар дэслэгч цол авсан. Харрийг хулигаан гэж хочилдог ч тэр эрэлхэг нэгэн, үүнээ ч баталж, Афганистанд алба хашсан. Тэрбээр хөлбөмбөг, поло, рэгби, усанд сэлэлт, морин спортоор хичээллэдэг. Харри ах Уильям шигээ төрийн чухал асуудал гэж тархиа гашилгадаггүй, харин эхтэйгээ адил /Диана гүнж/ буяны үйлсэд идэвхтэй зүтгэж, ядуу орнуудад зориулан мөнгө цуглуулж, баримтат кино хийдэг. Хөрөнгийн хэмжээ: 40 сая доллар.

Сириваннавари гүнж

Сириваннавари гүнж бол дэлхийн хамгийн баян хаан Тайландын Пумипон Адульядетын ач охин. 24 настай бүсгүй бас загвар зохион бүтээдэг аж. Түүний “Ethnic Rock” загвар 2007 онд Парисын Загварын долоо хоногийн үеэр олны хүртээл болсон. Гүнж мэргэжлээ дээшлүүлэн Японд дизайн судалж, Armani, Dior-т дадлага хийжээ. Тэрбээр мэргэжлийн бадминтонгчин бөгөөд 2006 онд Зүүн Азийн наадмаас алтан медаль хүртжээ. Хөрөнгө: 35 тэрбум доллар.

Иорданийн гүнж Иман

28 настай гүнж Иман бинт аль Хуссейн амьдралынхаа хэдэн жилийг армид зориулжээ. Тэрбээр 2002 онд Английн “Sand-hurst” цэргийн академийг төгсөж, эх орондоо цэргийн алба хашсан. Түүний хобби бол морин спорт. Хүчтэй эмэгтэйгээс эрчүүд айдаг бололтой. Иман гүнж одоо болтол нөхөрт гараагүй яваа.

Монакогийн гүнж Шарлотта

24 настай Шарлотта Казираги гүнж бол агуу жүжигчин Грейс Келлийн ач охин. Францад өссөн тэрбээр хаан ширээ залгамжлах эрхтэй дөрөв дэх хүн. Шарлотта гяланцаг сэтгүүлд нийтлэл бичиж, морь унан, төгөлдөр хуур тоглох дуртай. Үзэсгэлэн төгөлдөр, ухаан төгс бүсгүйг олон эр эргүүлдэг ч одоо болтол хэн ч түүний зүрхийг эзэмдэж чадаагүй байна. Хөрөнгө: 5,7 тэрбум доллар.

Монакогийн ханхүү Андреа

Шарлоттагийн ах Андреа Альберт Пьер Казираги одоо 26 настай. Тэр эх Каролинагийнхаа дараа хаан ширээ залгамжлах хоёр дахь хүн. Андреа олон дээд сургууль төгссөн, урлаг, улстөрөөр оролддог, ном унших хоббитой. Энэ бүхний зэрэгцээ ханхүү Андреа дээдсийн хүрээлэнгийн зугаа цэнгээнээс огт хоцордоггүй. Иймээс түүнтэй танилцъя гэвэл Английн клубүүдээр хэсэхэд л хангалттай. Нууцлаг, романтик түүнийг “Вампиртай хийсэн ярилцлага” киноны баатартай харьцуулдаг. Харин Андреа сүүлийн үед виски, марихуанд дурлах болсон гэдэг. Хөрөнгө: 1.7 тэрбум доллар.

АНЭУ-ын шейх Хамдан

28 настай шейх Хамдан бин Мохаммед Аль Мактум бол Дубайн хаан ширээ залгамжлагч, шейх Мохаммедын 19 хүүхдийн  нэг нь. Тэр Сэндхерстийн цэргийн академи, Лондоны эдийн засгийн сургуулийг төгсчээ. Хамдан хэдийнэ улс төрд хөл тавьсан бөгөөд одоо Дубайн Гүйцэтгэх зөвлөлийн тэргүүлэгч аж. Тэр шүлэг бичиж, Fazza гэсэн нууц нэрээр хэвлүүлдэг. Хамдан мөн тэмээ, машинд нугасгүй учраас эдгээрт мөнгө хайрлахгүй үрдэг. Бас шүхрээр үсрэх дуртай. Түүнийг ганц өөлөх юм бол лалын шашинтны ёсоор олон эхнэр авч таараа. Хөрөнгө: 18 тэрбум доллар.

Японы гүнж Такамадо

Японы императорын үеэл 25 настай Цугуко де Такамадог хүмүүс бараг мэдэхгүй. Учир нь Японд хувийн амьдралыг чанд нууцалдаг. Тэр тусмаа эзэн хааны гэр бүлийн талаар. Цугуко гүнж Эдинбургийн их сургуулийн нийгэм судлал, сэтгэл зүйн мэргэжлээр төгссөн. Одоо эх орондоо Васэдийн их сургуулийн олон улсын судалгааны факультетэд элсэн оржээ. Хип хоп дууны хоббитой гүнж Японы хатуу чанд уламжлалыг үл харгалзан хөгжилдөн цэнгэх дуртай аж.

Африкийн хаан Кгоси Леру

Өмнөд Африкийн БНУ-ын Бафокенгийн 36 дахь хаан Кгоси Леру эх орондоо Хилтоны коллежийн архитектурын ангийг төгсчээ. Тэр ажилдаа маш хариуцлагатай ханддаг бөгөөд Африкийн уугуул иргэдийг хамгаалах нийгэмлэгийн тэргүүн. Хааны мэдэлд дэлхийд хоёрт орох платин үйлдвэрлэдэг компани байдаг аж. Леру хаан нутаг нэгтнүүддээ итгэдэггүй учраас өрнөдийн багш нарыг хөлсөлж, сургууль нээсэн нь дэлхийд хүлээн зөвшөөрөгджээ. Хаан 42 настай ч гэр бүл зохиогоогүй яваа. Гэхдээ тэр спортын зааланд хичээллэх цаг зав гаргадаг. Леругийн хобби бол онгоцоор нисэх. Тэрбээр ӨАБНУ-ын Цэргийн нисэх хүчний хүндэт хурандаа аж.

Бельгийн ханхүү Амедео

25 настай ханхүү Амедео Мари Жозеф Карл Пьер Филипп Паоло Маркус Д’Авиано хаан ширээнд залрах магадлал бага, их оочертой байгаа. Тэрбээр Лондоны эдийн засгийн сургуулийг төгссөн, армийн бэлтгэл офицер. Одоо тэр Нью-Йоркийн “Delloite Touche Tohmatsu” аудиторын компанид ажилладаг. Ханхүүгийн хобби нь Төв цэцэрлэгт хүрээлэнгээр хөгжим сонсон гүйх. Тэр бүү хэл, 2008 онд марафон гүйлтийн тэмцээнд орж байсан аж.

Брунейн ханхүү Азим

28 настай ханхүү Азим хаан ширээ залгамжлах дөрөв дэх хүн. Тэрбээр Сандхерстэд сурч байгаад хатуу чанд дэглэмийг тэсэлгүй хаясан. Сэтгүүлчид түүнд их сайн. Учир нь ханхүү эцгийнхээ хөрөнгийг баруун солгойгүй үрж хэвлэлийн баатар болох дуртай. Үүний зэрэгцээ Азим буяны сан нээж, хараагүй хүмүүст тусалдаг. Хөрөнгө: 22 тэрбум доллар.

Ираны гүнж Нур Пахлави

Ираны хунтайжийн том охин, 19 настай Нур Пахлави гяланцаг сэтгүүлүүдийн нүүрнээс буудаггүй. Ираны хувьсгалын дараа гэр бүлээрээ дүрвэж, АНУ-д очоод тэнд суралцсан. Хобби нь үдэшлэг хэсэх, теннис тоглох. Нур гүнж англи, перс, франц, араб хэлээр чөлөөтэй ярьдаг.

Шведийн ханхүү Филипп

Вермландийн герцог, 31 настай Карл Филипп эгчийнхээ дараа хаан суудалд залрах юм. Тэрбээр Швед, АНУ-д график дизайн судалсан ч одоо ойн болон хөдөө аж ахуй, инженерийн мэргэжлийг сонирхох болжээ. Ханхүү Карл Филипп бол Тэнгисийн цэргийн офицер. Түүний хобби нь спорт машин, гэрэл зураг. Хамаг цагаа авто машины уралдаанд оролцож, фото үзэсгэлэн гаргаж өнгөрөөдөг.

Люксембургийн ханхүү

26 настай Феликс цэргийн хүн болохыг хүссэн ч өвдгөө гэмтээсний дараа Английн хааны цэргийн академиа орхижээ. Тэр их үрэлгэн. Иймээс Люксембург улс түүний өрийг дарах хэрэг үе үе гардаг аж. Тэгээд ч хааны гэр бүл дөрвөн тэрбум доллартай юм чинь. Гэхдээ сүүлийн үед хаан хүүгээ спортоор хичээллүүлэхэд их анхаарах болжээ. Феликс сагсан болон хөлбөмбөг, сноуборд, теннист дуртай гэнэ.

Германы ханхүү Альберт

Аварга том биетэй, 27 настай ханхүү Альберт Турн-и-Таксис саяхан Эдинбургийн их сургуулийн эдийн засаг, геологийн магистрын зэрэг авчээ. Түүний өвөг дээдэс үлгэрийн мэт баян, европын хамгийн алдартай хаад байсан юм. Ханхүү машинаар уралдах хоббитой. Тэрбээр Европын хурдны бүх замыг гарын 10 хуруу шигээ андахгүй. Хөрөнгө: 2,1 тэрбум доллар.