Аймгуудын угтах хаалганы дээд үнэ 600 сая төгрөгт хүрчээ

2019 оны 04 сарын 19

Аймгийн төв, хот сууринг өрх айлтай зүйрлэвэл угтах хаалга нь айлын хаалгатай дүйх. Айл гэрийн хаалга өнгө, үзэмжтэй байх нь тэр айл өөдлөн дэвжихийн бэлгэдэл болдог. “Өөдлөх айл үүд хаалганаасаа” гэдэг бэлэгшээлээ бодож, аймаг орон нутгууд өндөр сүрлэг угтах хаалгаар хоорондоо “уралдаж” байна. Гэвч аймгийн төвүүдийн угтах хаалга хэдэн зуун саяар хэмжигдэх үнээр босч, өртөг нь “тэнгэрт хаджээ”.

Энэ онд гэхэд хоёр ч аймаг нийлээд 700 сая төгрөгөөр хаалга босгох нь. Говьсүмбэр аймагт 2019 онд цөөнгүй бүтээн байгуулалтын ажил хийгдэх бөгөөд түүний нэг нь 81.8 сая төгрөгөөр босох угтах хаалга. Говьсүмбэр аймгийн Засаг даргын Тамгын газраас “Үдэлт, угталтын хаалга” босгохоор төлөвлөж, улсын төсвөөс 81.8 сая төгрөгийг зарцуулахаар болжээ. Харин Өмнөговь аймаг энэ жилийг их бүтээн байгуулалтын жил болгон зарласантай холбоотойгоор аймгийн төвөөс Улаанбаатар хот руу гарч байгаа хатуу хучилттай зам дээр угтах, үдэх хаалганы цогцолборыг 600 сая гаруй төгрөгөөр барихаар болжээ. Тус хаалга нь зөвхөн хаалга байх бус угтах, үдэх талбай, авто зогсоол, явган хүний зам, иж бүрэн гэрэлтүүлэг, нийтийн био бие засах газар зэрэг багтсан цогцолбор байхаар төлөвлөжээ. Уг хаалга бүхий цогцолборын зураг төслийг “Эм Эс Эл” ХХК хийж гүйцэтгээд байгаа аж.

ӨВӨРХАНГАЙ 330 САЯ, ЭРДЭНЭТ ХОТ 280 САЯ ТӨГРӨГИЙН УГТАХ ХААЛГАТАЙ

Өмнөх жилүүдэд аймгууд ямар үнээр угтах хаалга босгосон талаар мэдээлэл хүргэе. Одоо бүтээн байгуулагдсан хамгийн өндөр үнэтэй хаалга нь Өвөрхангайн угтах хаалга юм. Өндөр гэгээн Занабазарын мэлмий гийсний 380 жилийн ойг угтаж, 2015 онд Өвөрхангай аймгийнхан 330 сая төгрөгөөр угтах хаалга босгожээ. Арвайхээр хотоос зүүн хойш 17 км, Онги голын гүүрнээс 3.2 км зайд барьсан уг хаалга нь 330 сая төгрөгөөр бүтжээ.

Эрдэнэт хотын хувьд 40 жилийн ойг тохиолдуулан Эрдэнэт хотын шинэ хаалга барьж байгуулах ажлыг “Аз жаргалын угтах хаалга” ТББ-ын тэргүүн Б.Азжаргал санаачилж, аймгийн ЗДТГ, ИТХ-аас дэмжлэг үзүүлэн 285 сая төгрөгөөр барьсан байна. Хаалганы орчинд авто машины зогсоолтой бөгөөд хүнсний дэлгүүр, эмийн сан, дугуй засвар зэрэг цогцолбор байгууламжийг барьжээ. Эрдэнэт хотын хаалга барих ажлыг Орхон аймгийн “Наран орд” компани гүйцэтгэсэн байна.

Булган аймаг байгуулагдсаны 80 жилийн ойгоор “Анхдагчдын өлгий нутаг” нэртэй хаалга бүтээн байгуулсан. Булган аймгийн хаалга 280 сая төгрөгөөр бүтсэн бөгөөд хаалгыг тус аймгийн “Эвсэг сайхан” компанийнхан өөрсдийн хөрөнгөөр барьж, нутагтаа хандивлажээ.

Хэнтий аймгийнхан “Их эзэн Чингис хааны өлгий нутаг” нэртэй хаалгыг 2013 онд барьж, байгуулсан. Энэ хаалга нь 190 сая төгрөгөөр бүтжээ. Энэ мэтээр Дархан-Уул, Дорноговь, Сүхбаатар гээд аймгууд дор бүрнээ багагүй үнэтэй хаалга барьж байгуулсан байна.

СУМДУУД УГТАХ ХААЛГАТАЙ БОЛЖЭЭ

Аймгууд төдийгүй сумын төвүүд ч угтах хаалгатай болоод байна. Улсын хэмжээнд 2014 онд 118 сум 90 жилийн ой болон тэгш ойн баяраа өргөн дэлгэр тэмдэглэсэн. Бидэнд олдсон мэдээллээр зөвхөн сум байгуулагдсаны ойн хүрээнд бүтээн байгуулалт нэрээр 10-аад сум угтах хаалгатай болж байжээ.

Өвөрхангай аймгийн Хужирт сумын хаалгыг Сумогийн их аварга Асашёорюү Д.Дагвадорж сумынхаа 90 жилийн ойд зориулан хандив өргөн, барьж байгуулсан байна. Мөн Өвөрхангай аймгийн Баруунбаян-Улаан сумын Улаанбаатар хот дахь нутгийн зөвлөлийнхөн сумынхаа 90 жилийнхээ ойгоор угтах хаалга барьж өгчээ.

Баянхонгор аймгийн Баянбулаг сум түүхт 90 жилийнхээ ойгоор угтах хаалгатай болжээ. Сумынхаа ойд Пэрэнлэйн Доржийн үр хүүхдүүд, ач зээ нараас нутагтаа угтах, үдэх хаалгыг бүтээж өгсөн байна.

Ховд аймгийн Мөнххайрхан сумын 90 жилийн ойг угтсан бүтээн байгуулалтын ажлын хүрээнд Ерөнхий боловсролын 12 жилийн багш, ажилчид санаачлан сумын угталтын хаалга бүтээн босгожээ. Сумын угтах хаалгыг өөрсдийн хөрөнгөөр таван сая төгрөг зарцуулан босгожээ.

Дорноговь аймгийн Өргөн сумын ЗДТГ-аас санаачилж, 2017 онд сумандаа зочдыг угтах, үдэх хаалгыг барьж ашиглалтад оруулсан. Дээрх бүтээн байгуулалтыг Орон нутгийг хөгжүүлэх сангийн 28.8 сая төгрөгийн хөрөнгөөр “Эвийн гэрээ” ХХК  гүйцэтгэжээ.

АЙМГУУДЫН УГТАХ ХААЛГА ДАРГА НАРЫН БИЗНЕС БОЛСОН УУ

Аймаг, хотоос эхлээд сум суурин хүртэл угтах хаалга нэртэй хөшөөнд ийнхүү олон сая төгрөг зарцуулж байна. Нийлбэр дүнгээрээ хэдэн тэрбум төгрөгөөр тооцогдох хөрөнгө ийнхүү хөшөө болон царцжээ.

Аймгуудын угтах хаалга өндөр үнэтэйдээ биш, өнгө үзэмжтэй, дотоод гадаадын жуулчдад зүг заах, хөтөч болох ёстой. Гэвч угтах хаалганд тийм мэдээлэл байдаггүй. Аймгуудын угтах хаалга багадаа 70-80 сая төгрөг, хамгийн өндөр үнэтэй нь 600 сая төгрөгөөр бүтэж байна. Ийм өндөр үнэтэй босдог эсэхийг мэргэжлийн хүнээс тодруулсан юм.

Барилгын инженер Н.Болдбаатар “Тухайн хаалганд орж буй материалаас шалтгаалж үнэ харилцан адилгүй байж таарна. Боржин чулуу, өндөр үнэтэй металл орсон бол өртөг өндөр гарах ёстой. Дээр нь хаалганы зураг төслийн зардал орно. Тэглээ гээд 300 сая болохгүй байх. Одоо аймгуудад баригдаж байгаа хаалганы бодит өртөг 60-70 сая төгрөгөнд багтах боломжтой” гэлээ.

Жил ирэх тусам хаалганд зарцуулах төсөв нэмэгдэж, хаалганы дээд үнэ 600 саяд хүрээд байна. Ийнхүү олон сая төгрөг хаалга нэртэй хөшөөнд зарцуулах болсны цаана аймаг, орон нутгийн дарга нарын хувийн ашиг сонирхол, бизнес болсон юм биш биз гэж хардаж болохоор байна. Улсын төсвөөс олон сая төгрөгөөр хаалга босгодог жишгийг хязгаарлах цаг иржээ.

Эх сурвалж: 

 

Сэтгэгдэл ( 11 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Зочин(103.14.38.142) 2019 оны 04 сарын 22

Энэ хаалганы хэрэг байна уу,болимоор юмаа,тэр их мөнгөөр эмнэлэг,цэцэрлэг,сургууль барих хэрэгтэй ш дээ.

Зочин(43.250.126.130) 2019 оны 04 сарын 21

Эргүү дагзнууд яаж мөнгө саах аргаа барах юм. Ингэж элийрч байхаар аймаг сумандаа нэг нэг цэцэрлэг сургуль эмнэлгийн барилга бариасай билээ.

Zochin(202.126.89.82) 2019 оны 04 сарын 21

Darhan hezee haalga hiisiin. Ali 50 garui jiliin umnuh haalga bj l bna. Hudlaa bichihee bolio

БОЛОРОО(202.9.42.123) 2019 оны 04 сарын 21

Энэ хаалгаар яадаг бнаа! Мосзва Бээжингийн үдэх угтах хааога гэж бдаг билүү? Аймаг сумдад хаалга тийм чухал уу? Өөр хийх юм алга уу? Архидах пялдагадах хаалга гэж нэрлэвэл таарна.

dsn(122.201.22.50) 2019 оны 04 сарын 20

Mungu tsagaan nud ulaan gedeg ene iim ih munguur tuhain nutgiin irgeded tustai yu ch buteen baiguulj bolno shuudee! Naalga haraad gedes tsadah uu? Harin ch arhidaltiin 1 tseg nemegdej bn.hereggui yumand durlah heregguiee . harin ch amind haltai tuhaibol ; ene jil zamiin uudiin haalgiig avtobus murguj olon humuunii ami hohiroo bus uu?!

иргэн(202.9.43.25) 2019 оны 04 сарын 20

Улаанбаатар хот маш сайхан хаалгатай болох ёстой,УИХ-ын 76 малын санал өгүүлэх гэж 600 саяыг гаргаж байгаа юм чинь хаалганд мөнгө зарах ёстой шүү, орох айл үүднээсээ гэж монголчууд ярьдаг шүү дээ.Шинэ нисэхийн замын дагуу Айдасын даваан дээр барих ёстой.

зочин(66.181.161.2) 2019 оны 04 сарын 20

Болохгүй юм юу байна аа идэх чинь моод болсон ш дээ идэлгүйл хийсэн бол сайхан энэ чинь түүх ш дээ

Zochin(103.57.95.166) 2019 оны 04 сарын 19

Iim haaalgan dooguur yadag yum bloo neg l I”d shid bn yamar id shid bdgiig mdeh yumsan orkuudaa

Oyungerel(202.9.43.90) 2019 оны 04 сарын 19

Yaj bodoj hiiheeree 600say hurdeg bnaa arai l denduu tusuwluh yumaa

irgen(202.21.105.38) 2019 оны 04 сарын 19

Энэ угтах хаалгаар яадаг байнаа, замын аятайхан тэмдэг л босгочихно биз дээ.

ард иргэд(202.9.42.139) 2019 оны 04 сарын 19

ХҮН БҮР ДОР БҮРНЭЭ МӨНГӨ ИДЭХИЙн НЭГ ХЭЛБЭР АЙМАГ СУМДЫН ЗД НАР ЯАЖ МӨНГӨ ЦОХИХ БЭ ГЭДЭГ НЬ ТОЛГОЙНЫ ӨВЧИН БОЛДОГ ЮМ,,,,ҮҮНИЙГ ШАЛГААД УЛСЫН ХӨРӨНГӨ ИДСЭН ЭРҮҮТЭЙ МАШ ЧАНГА ХАРИУФЦЛАГА ТООЦОХ ХЭРЭГТЭЙ ДЭЭ???????

Top