Нефтийн үнийн өсөлтийг дагаж түлшний үнэ өсч байна  

Дэлхийн зах зээл дээр түүхий нефтийн ханш өсөлттэй байна.

Өнөөдрийн байдлаар нэг баррель цэвэр түүхий нефтийн ханш 63.67 ам.доллар байна. Манай тухайд түлшээ импортоор авдаг тул дэлхийн зах зээл дээрх нефтийн үнийн савлагааг дагадаг жишигтэй. Тэрчлэн энэ сарын эхээр импортлогчид шатахууны үнийг литр тутамд 50 төгрөгөөр нэмээд байсан бол өнөөдрөөс 80 орчим төгрөгөөр нэмж байгаа аж.

Импортлогчид 2018 онд шатахууны үнийг таван удаа дараалан нэмснээр литр тутамд 350-380 төгрөгөөр өссөн байдаг. Харин өнгөрсөн оны сүүлчээр дэлхийн зах зээл дээр газрын тосны ханш буурсан нь, манай импортлогчдын хувьд шатахууны үнийг буулгах гол үндэслэл болсон. Ийм үндэслэл байгаа тул үнээ буулга гэсэн шаардлагыг Засгийн газраас тавьж, импортлогчид 200-250 төгрөгийн хооронд шатахуун түлшний үнийг бууруулсан. 

Тэгвэл одоо дэлхийн зах зээл дээрх нефтийн үнийн өсөлт саарахгүй шинжтэй байгааг шинжээчид прогнозлон хэлж байна.

Энэ сарын 24-ний өдрийн байдлаарх түлшний үнийн мэдээллийг хүргэе.

“Дизель түлш” 2195-2335 төгрөгийн үнэтэй байсан бол  “Аи-76, 80” шатахуун 1630-1700 төгрөгийн үнэтэй байна. “Аи-92, 93” шатахуун 1660-1785 төгрөг,  “Аи-95” шатахуун түгээх станцуудаар 2180-2245 төгрөгийн үнэтэй байна. “Газ” тогтмол 1,300 төгрөгийн үнэтэй байв.