Т.Лхагвасүмбэрэл агсны амь насаа алдсан хэргийг ДАХИН ШАЛГАХЫГ шаардлаа

"ИРВЭС ХАМГААЛАХ САН"-ГИЙН БИОЛОГИЧ
ТӨМӨРСҮХИЙН ЛХАГВАСҮМБЭРЭЛ АГСАН
 

1988 оны дөрөвдүгээр сарын 06-нд Архангай аймгийн Их тамир суманд төрсөн. Айлын ууган хүү.

1996 онд Хөвсгөл аймгийн Хатгал тосгоны бага сургуульд элсэн орж, улмаар 2006 онд МУИС-ийн Биологийн ангид элсэж, 2010 онд Амьтан судлаач мэргэжлээр төгссөн.

2010 оноос “Ирвэс хамгаалах сан”-д ажиллаж, Өмнөговь аймгийн Тост, Тосонбумбын нурууны цоохор ирвэсний урт хугацааны судалгааны төвийн менежерийн ажлыг үр бүтээлтэй гүйцэтгэж байсан.

Ажиллаж байх хугацаандаа МУИС-ийн магистрантурт элсэн суралцаж, цоохор ирвэсний үндсэн идэш болох янгирын судалгааг Монголд анх удаа давхар ажиглагчийн аргаар амжилттай судалсан. Судалгааны үр дүнгээ Олон улсын мэргэжлийн сэтгүүлд хэвлүүлж, түүгээрээ магистрын зэрэг хамгаалахаар бэлтгэж байсан.

Нутгийн иргэдэд байгаль орчны боловсрол олгох чиглэлд онцгой анхаарч, малчид-ирвэсний хоорондын зөрчлийг бууруулахын тулд махчин амьтнаас малаа хамгаалах хашааг нэвтрүүлэх ажлыг Олон улсын санхүүжилтээр эхлүүлэн ажиллаж байсан.

Т.Лхагвасүмбэрэл агсан МУИС-ийн магистрантурт суралцах богино хугацаандаа судалгааны ажлын үр дүнгээрээ Олон улсын нэр хүнд бүхий сэтгүүлд гурван өгүүлэл хэвлүүлж, эрдэм шинжилгээний ажлын гүйцэтгэлээрээ үлгэр дууриал болохуйц түвшинд ажиллаж байжээ. Тэрээр мөн 2004 онд Хөвсгөл аймагт болсон Биологийн олимпиадад нэгдүгээр байр, 2009 онд зохиогдсон зэрлэг амьтдын гэрэл зургийн уралдаанд 3 дугаар байр, 2013 онд байгууллагын аварга болж, 2014 онд өөрийн дэвшүүлсэн төслөөрөө Олон улсын байгууллагаас судалгааны тэтгэлэг хүртэж байсан юм. 

Т.Лхагвасүмбэрэл агсан “Ирвэс хамгаалах сан”-гийн Өмнөговь аймгийн Тост, Тосон бумбын нуруун дахь Хээрийн судалгааны төвд биологичоор ажиллаж, Тост, тосон бумын нуруунд ашиглалтын болон хайгуулын лиценз ихээр олгосныг эсэргүүцэн тэмцэж байх үедээ буюу 2015 оны арваннэгдүгээр сарын 6-нд цаг бусаар амиа алдсан юм.