“Эх оронч” хятад одод Барууны брэндээс татгалзаж эхэллээ

Хонконгийн эсэргүүцлийн хөдөлгөөн эхэлснээс хойш Хятадын Засгийн газар гадаадын компаниудыг газар нутгийн бүрэн бүтэн байдлыг нь хүндлэн үзэж байгаа эсэхийг сайтар шалгадаг болоод байгаа. Тайвань, Хонконг, Макао зэрэг тусгай бүсүүдийг Хятадаас тусгаар гэж үзсэн ямар ч том брэнд, компанийг тэд Хятадаас шахан гаргаж байна.

Энэ сарын 11-нд Италийн алдарт Versace дэлхийн улс орнуудын нийслэлийг бичсэн загвартай богино цамц худалдаанд гаргасан юм. Цамцан дээр Макао, Хонконгийг тусгаар улс гэж бичсэн нь урд хөршийн хилэнг хүргэсэн. Өнгөрсөн зургаадугаар сард тус брэндийн Хятад дахь элч болсон жүжигчин Ян Ми тэр дор нь Versace-тэй байгуулсан гэрээгээ цуцаллаа.

Америкийн Coach, Францын Givenchy гэсэн хоёр том компани ч Хонконгийг аль улсын эзэмшил болохыг бичээгүй, Тайбэй хотыг Тайвань арлын нийслэл гэсэн бичигтэй цамц гаргаад хоригт оржээ. Хятадын супер модель Лю Вэнь Coach брэндийн хувцсыг дахин өмсөхгүй, гэрээгээ цуцалснаа зарлаад ард түмнээсээ хүлцэл өчсөн байна. Givenchy-гийн нүүр царай байсан дуучин Жексон И “Би нэгдмэл Хятад орны бодлогыг дэмждэг. Улс эх орныхоо бүрэн бүтэн байдлын төлөө тэмцэнэ” гээд мөн л гэрээнээсээ татгалзжээ.

Австрийн Swarovski, Японы Asics брэндүүдээс татгалзсанаа тэдний Хятад дахь элч нь байсан Цзян Шу Ин, Хань Дун Цзюнь, Сун Вэй Лун нар зарласан бол Линь Юнь Америкийн Calvin Klein брэндтэй холбоогоо тасаллаа.

Өмнөд Солонгосын “Samsung Electronics” ч Нэгдмэл Хятад бодлогыг дэмждэггүй тул  EXO хамтлагийн хятад дуучин Лэй холбоогоо тасалсан байна.

Одоогийн байдлаар дээр дурдсан Samsung-аас бусад бүх брэнд тэрбум хол давсан хүнтэй асар том зах зээлээ алдахгүйн тулд Хятадын талаас албан ёсоор хүлцэл өчөөд байгаа юм.