АРХАНГАЙ: Бэлчээрийн даац нутгийн 50 орчим хувьд хүрэлцээтэй

Архангай аймгийн Ус цаг уур орчны шинжилгээний газраас Монгол Улсын Засгийн газрын 286 дугаар тогтоолын дагуу Ус цаг уур, орчны судалгаа, мэдээллийн хүрээлэнд 2019-2020 оны өвөл, хаврын бэлчээрийн даацыг баг бүрийн бэлчээрийн ургац, малын тоо, бэлчээрийн талбайн хэмжээ, бэлчээр ашиглах хугацаа зэрэг мэдээлэл дээр үндэслэн багийн нутгаар тооцоолж гаргаж өгчээ.

Архангай аймгийн нутгаар зуншлага 2019 оны наймдугаар сарын 20-ны байдлаар 60 гаруй хувь нь сайн, 40 орчим хувь нь дунд байжээ. Бэлчээрийн даацыг аймгийн нийт нутгаар тооцоолж гаргасан дүнгээс үзвэл нутгийн 50 орчим хувьд нь бэлчээр хүрэлцээтэй, 35 гаруй хувьд даац 3-5 дахин хэтэрсэн, 10 гаруй хувьд нь олон дахин хэтэрсэн байдалтай байна. Өөрөөр хэлбэл, нийт нутгийн 50 орчим хувьд нь өвөл-хаврын бэлчээрийн даац хүрэлцээтэй байхаар, харин 50 гаруй хувьд хэтэрсэн үзүүлэлттэй байна.