Дэлхийн аварга Н.Онондарь: Бүжиг надад бүхнийг өгсөн

Герман улсад зохион байгуулагдсан латин бүжгийн Дэлхийн аварга шалгаруулах тэмцээнд Германы “Grun Gold” хамтлаг түрүүлж, Дэлхийн  аварга боллоо. Дэлхийн есөн удаагийн аварга энэ хамтлагт монгол охин бүжиглэдэг ба түүнийг Н.Онондарь гэдэг. Тэрбээр 2018 онд мөн хамтлагаараа Дэлхийн аварга болж байсан юм. 

​​​​Дэлхийн хошой аварга Н.Онондарийг манай уншигчид эчнээ таних билээ. Германы “Grun Gold” хамтлагийн нүүр царай болсон бүжигчин бүсгүй өдгөө Германы Бремен хотод амьдардаг ба Спортын сэтгэл судлал мэргэжлээр сурдаг билээ. Бүжгийн төрөлд Дэлхийн аваргын цомыг хоёр дахь удаагаа өргөсөн Н.Онондарийн энэ оны дөрөвдүгээр сард Зиндаа.мн сайтад өгч байсан ярилцлагыг түүнийг шинэ амжилт гаргасныг тохиолдуулан дахин хүргэж байна. 

Ярилцсан өдөр: 2019.04.10

-Монголынхоо нэрийг дэлхийд гаргаж яваа танаар хүмүүс бахархдаг. Өөрийнхөө талаар илүү дэлгэрэнгүй танилцуулаач...

-Сайн байна уу. Намайг Нэргүйн Онондарь гэдэг. 22 настай. Германы Бремен хотод сурч байна. Германы шигшээ багт бүжиглэдэг. Энд хоёр дахь жилдээ амьдарч байна.

-Хэдэн настайгаасаа бүжиглэсэн бэ?

-Таван настайдаа анх Монголын хүүхдийн ордонд бүжгийн ангид орж байсан. Түүнээс хойш олон сайхан багшийн гар дамжин суралцаж ирсэн. Жаргалсайхан, Мөнгөнхуяг, Гэрэлтуяа зэрэг багш нар маань бий. Хамгийн их нөлөөлсөн багш маань Гэрэлтуяа. Намайг их задалсан гэх үү дээ.

-Ямар, ямар төрлийн бүжиг бүжиглэдэг вэ?

-Ер нь бол балетаас бусдыг нь бүжиглэдэг.

-Монгол бүжгээ бүжиглэдэг л байх...

-Бүжиглэчихдэг шүү.

-Гадаадад амьдрах, гадаад хэл сурахын давуу тал юу байдаг бол, энэ талаар?

-Гадаадад амьдрах хамгийн эхний давуу тал бол бие дааж сурна. Өөр хэл дээр хичээл сурна гэдэг амаргүй. Тухайн улсын ёс заншил, хүмүүсийнх нь сэтгэхүйг мэднэ гэдэг бол маш том давуу тал. Гадаад хэл сурахын давуу тал гэвэл залуус эхлээд англи хэл сурвал зүгээр байх. Англи хэлээр дэлхий даяар ярьж байна. Гадаад хэл сурах нь хүнд зорилгынх нь үүд хаалгыг нээж өгдөг. Энэ нь л хамгийн том давуу тал гэж боддог.

-Гаргаж байсан хамгийн том амжилтуудынхаа талаар яриач?

-2018 онд болсон Латин бүжгийн ДАШТ-д Германы багтайгаа оролцож нэгдүгээр байрт орсон. Энэ бол хамгийн том бахархал болсон амжилт минь.

-Танай багт өөр монгол хүн бий юу. Хослон бүжиглэгч нь гадаад хүн байдаг байх, хамтрагч нарынхаа талаар?

-Багтаа би ганцаараа монгол. Бусад нь герман бүжигчид. Миний хослон бүжиглэгч маань герман хүн.

-Бүжгийн урлаг хүнд олон зүйлийг өгдөг. Та бүжгийн спортоор хичээллээд хэрхэн өөрчлөгдсөн бэ?

-Бүжиг бол надад бүх зүйлийг өгсөн. Гоозүй, хүнтэй харьцах харьцаа, өөртөө итгэх итгэл, мэдрэмж гээд л. Бүжгээс авч байгаа кайф бол юутай ч зүйрлэшгүй маш том бэлэг байдаг.

-Залуу хүнд өмнөө тавьсан зорилго их байх. Цаашдын зорил­гынхоо талаар хуваалцаач...

-Цаашдын зорилго бол амжилтаа дахиад бататгах. Түүнчлэн төгсөөд мэргэжлээрээ ажиллах. Би спортын сэтгэлзүйгээр сурдаг. Цаашаа сурч байгаа мэргэжлээрээ мастер хамгаалахыг зорьж байгаа. Юу болохыг харж л байя. Спортын сэтгэлзүйгээрээ Монголдоо ажиллаж, Монголынхоо тамирчдыг олон улсад явахад нь дагаж, сэтгэлзүйн тал дээр нь бэлдэж, дэмжихийг маш их мөрөөддөг. Мэргэжлээрээ цаашид олон олон тамирчдын амжилтад нөлөөлөхийг хүсдэг.

-Бүжгээр хичээллээд, гадаадад амьдрахад хэцүү зүйл тохиолдож байв уу?

-Ер нь бол хүнд хэцүү үеүд тохиолдож байсан. Монголд биш өөр сэтгэхүйтэй, өөр улсад ирээд шигшээ багт нь бүжиглээд, тэмцээн уралдаанд өрсөлдөхийн хажуугаар сарын хэрэгцээнийхээ зардлыг олно. Хичээл ном, бүх юмаа амжуулах гэж нэг хэсэг хэцүү байсан. Бүх юмыг давхар хийж байлаа. Харь улсад, герман сэтгэхүйг ойлгоход анх бэрхшээл гардаг байсныг нуугаад яахав. Одоо бол харьцангуй ойлгодог болсон.

-Аливаа бэрхшээлийг хэрхэн даван туулдаг вэ?

-Аливаа бэрхшээлийг даван туулахад надад гэр бүл минь маш их нөлөө үзүүлдэг. Хэцүү зүйл болж, шантрах үе гарахад гэр бүлийнхэнтэйгээ ярина. Эцэг эх, гэр бүлийнхэн маань дэмжиж, зөвлөгөө өгдөг. Тэднийхээ ачаар л бүгдийг даван туулдаг.

-Бүжгээс өөр ямар хоббитой вэ?

-Бүжгээс өөр ном унших, кино үзэх, усанд сэлэх дуртай.

-Цоглог, дайчин, эрч хүчтэй энэ бүсгүйн хамгийн айдаг зүйл юу вэ?

-Өөрийгөө алдахаас айдаг.

-Бүжиглэж байхдаа мэдэрдэг тэр мэдрэмжийнхээ талаар хуваалцахгүй юу?

-Бүжиглэж байхдаа мэдэрдэг тэр мэдрэмжийг бүжигчин хүн бүр өөрөөр хэлэх байх. Миний хувьд бүжиглэж байхдаа тэс өөр ертөнцөд байгаа юм шиг мэдрэмж төрдөг.
 

-Юунаас хамгийн их эрч хүч авдаг вэ?

-Хамгийн их эрч хүчийг урмын үгнээс авдаг.

-Ямар дуу, хөгжим сонсдог вэ?

-Янз бүрийн дуу сонсдог. Аль гоё санагдсаныгаа сонсоно.

-Таны бодлоор монгол залуус дэлхийн залуустай харь­цуулахад ямар хэмжээнд байна. Бид юугаа өнгөлж тордож, юугаа засч залруулах хэрэгтэй юм шиг санагдав?

-Миний бодлоор монгол залуус дэлхийн залуустай харьцуулахад сэтгэхүй, IQ талдаа маш дээгүүр байдаг юм шиг санагдсан. Жаахан хариуцлага муутaй, цаг барьдаггүй, залхуу юм шиг санагдсан боловч бүх чадвараараа дэлхийд нэлээд дээгүүрт яваа шүү. Хаана ч дутахааргүй гэж боддог.

-Монголынхоо нэрийг гар­гаж яваа таниас залуус үлгэр дуурайлал авдаг. Уншигч залуус­таа хандаад зөвлөгөө өгөөч...

-Залуустаа хандаж зөвлөхөд мөрөөдөлдөө үнэнч, өөртөө итгэлтэй, зорилгодоо үнэнч байгаарай гэж хэлмээр санагддаг.

-Эмэгтэй хүн ямар байх ёстой гэж боддог вэ?

-Жинхэнэ эмэгтэй хүн гэвэл ээж шигээ эмэгтэйг хэлнэ. Эмэгтэй хүн өөрийгөө хайрладаг байх хэрэгтэй. Үүнээс гадна бусдыг маш сайн хайрлаж, халамжилдаг байх хэрэгтэй.

-Сэтгэл тавгүй, хүнд үед юу хийдэг вэ?

-Хэцүү, бэрхшээлтэй үедээ би цаас гаргаад өөрт юу байгаагаа эхнээс нь бичдэг. Хоёр хөлтэй, хоёр гартай, бүтэн биетэй, ээж аавтай, ах дүүтэй гээд л байгаа бүх зүйлээ жагсаадаг. Мөн өнөөдөр ямар хоол идсэн зэргээр амьдралд байгаа хамгийн сайхан зүйлүүдээ бичнэ. Тэгсний дараа сэтгэл тавгүйтэл зүгээр болдог.

-Спортын сэтгэлзүйч гэдэг мэргэжил Монголд хэр хөгжсөн юм шиг санагддаг вэ. Тамирчин хүний нүдээр харахад энэ салбар Германд хэр хөгжсөн байна?

-Олон улсын бүх тамирчид сэтгэлзүйчтэй байдаг. Сэтгэл­зүйч байхгүй юмаа гэхэд дасгал­жуулагчид нь мэдлэгтэй. Тамирчдынхаа сэтгэлзүйтэй нь тулж харьцдаг. Сэтгэлзүй байхгүй бол 100 хувийн бэлтгэлийг дэвжээн дээр гараад 10 хүртэлх хувиар бууруулдаг сул талтай. Тэгэхээр сэтгэлзүй бол бэлтгэлээс илүү нэгдүгээрт тавигдах ёстой зүйл гэж боддог. Би өөрөө тамирчин хүн болохоор тэр тусмаа сайн ойлгодог. Тэмцээний өмнөх дарамт, айдас, сэтгэл хөөрөл гэх мэт олон зүйл бий.

-Хавар болж, бүсгүйчүүд жингээ барих, гоолиг байх та­лаар ярьж эхэлсэн. Таны хувьд жиндээ хэрхэн анхаардаг вэ?

-Зөв, эрүүл хооллохыг их хичээ­дэг. Хэрвээ илүү идсэн бол илүү бэлтгэл хийдэг. Бас сайн унтаж амрахыг их хичээдэг. Боломж гарвал сайн амарч байх хэрэгтэй.

-“Facebook” хэр их ашигладаг вэ?

-Гэрийнхэнтэйгээ холбоотой байхын тулд хэрэглэдэг. Аль болох цахимд цаг үрэхгүй байхыг хичээдэг.

-Залуучууд чатаар танилцах, болзох хүсэлт их тавьдаг байх. Найз залуутай юу?

-Найз залуу одоогоор байхгүй. Би хувьдаа амьд харилцааг их эрхэмлэдэг.

-Германчууд Монголыг хэр мэддэг санагдав. Таныг монгол гэхэд хүмүүс юуг хамгийн их сонирхож байсан бэ?

-Энд зарим хүн Монголын талаар мэддэггүй. Гэхдээ цэвэр герман хүмүүс нь бол Монголыг сайн мэднэ. Бидний соёл, ёс заншлыг их сонирхож асуудаг.

-Ном унших дуртай гэсэн. Сэтгэлд тань хамгийн их хоногшиж үлдсэн ном юу байв?

-Михаэл Эндегийн “Момо” ном сэтгэлд хоногшиж үлдсэн.

-Тэгвэл сэтгэлд хамгийн тод үлдсэн кино?

-Италийн “Амьдрах сайхан”.

-Өндөр өсгийт өмсөх, намхан ултай гутал өмсөх хоёрын алийг нь сонгох вэ?

-Намханыг нь сонгоно.

-Нүүрээ тод будах таалагддаг уу, эсвэл хөнгөн будах зүгээр үү?

-Хөнгөн будаад гарахыг илүүд үздэг.