Г.Тэмүүлэн: Оюутолгойн төсөл хоёр талын эрх ашгийг хөндөхгүйгээр цааш явахгүй

УИХ-аас Оюутолгойн гэрээний хэрэгжилттэй холбоотой тогтоолын төслийг баталсан. Үүнтэй холбогдуулан УИХ-ын гишүүн Г.Тэмүүлэнгээс дараах зүйлийг тодрууллаа. 

-УИХ-аас Оюутолгойн гэрээний хэрэгжилт, үйл явцтай холбоотой тогтоолын төслийг баталсан. Цаашид ямар процесс үргэлжлэх нь тодорхойгүй байна шүү дээ. Үүнд та тайлбар өгөхгүй юу?

-Оны өмнөхөн УИХ-аас Оюутолгойн гэрээний хэрэгжилт болон төсөл үйл ажиллагааны явцтай холбогдуулан анх удаа тогтоолыг баталлаа. Нийт долоон зүйл, заалт бүхий УИХ-ын тогтоолын батлаад байна. Тухайлбал, Оюутолгойн төсөлд Монгол Улсын эрх ашгийг хангуулах тухай заалт бий. Энэ асуудлыг ямартай ч холбогдох байнгын хороодод үүрэг даалгавар өгнө. Түүнийгээ эргээд Засгийн газар тухайн долоон зүйл, заалт бүхий үүрэг даалгаврын хугацаанд нь биелүүлэх, УИХ-д эргэн танилцуулах болон холбогдох байнгын хороодод тайлагнахыг зааж өгсөн. Аливаа асуудал бол хугацаатай. Ойрын гурав, дөрвөн сарын хугацаанд багтаж Засгийн газар яриа, хэлэлцээрээ хийх ёстой. Түүнийхээ үр дүнг УИХ-д танилцуулах үүрэгтэй.

Мэдээж өөрсдийнхөө эрх хэмжээний хүрээнд Засгийн газар тодорхой асуудлыг шийдүүлэх эрхтэй. Шаардлагатай тохиолдолд эрх зүйн орчныг шинээр бүрдүүлэх, магадгүй тухайн УИХ-ын тогтоолд заасан Монголын талын эзэмшиж байсан хувь хэмжээг ашигт малтмалын нөөц ашиглах нэмэлт хэлбэрээр орлуулах, эсвэл цаашид Монголын төр тухайн орд газарт хувь эзэмшихгүйгээр татвараа нэмэгдүүлсэн байдлаар аваад явах гэх мэт асуудлыг зайлшгүй оруулж ирж танилцуулах шаардлагатай байна. Бүх асуудал Засгийн газарт, тодорхой ажлыг хариуцсан сайд нар нь томилогдсон байна билээ. Цаг хугацаандаа хөрөнгө оруулагч талтай гэрээ, хэлэлцээрээ хийгээд үр дүнгээ танилцуулаад явна гэж ойлгож болно.  

-Энэ асуудлаар хөрөнгө оруулагч талтай ойрын хугацаанд уулзалт хийсэн болов уу. Танд ямар нэгэн мэдээлэл байна уу?

-Надад тодорхой мэдээлэл бол алга. Гэхдээ бүх асуудал Засгийн газарт шилжсэн. УИХ-аас тогтоолоо баталсан, үүрэг чиглэлээ өгсөн. Тогтоолынхоо хэрэгжилтийг шахаж шаардана. Засгийн газраас ойрын хугацаанд багтаж гэрээнийхээ үүрэг, хэрэгжилтийг танилцуулах шаардлагатай байгаа юм. 

-УИХ-ын ээлжит сонгуулиас өмнө ямар нэгэн шийдэлд хүрэх үү?

-Үр дүн гарах бүрэн боломжтой. Хоёр талд хуримтлагдсан асуудал бий. Төслийг үр өгөөжтэй болгож, хэрэгжилтийн явцад гарсан хүндрэл, бэрхшээлийг зайлшгүй шийдэх ёстой. Энэ төсөл харилцан ашигтай байж цаашид явна. Хоёр талын эрх ашгийг хөндөхгүйгээр байр суурийг нь сонсохгүйгээр төсөл цааш нь явахгүй. 

-Оюунтолгойн төсөлтэй холбоотой УИХ-аас гаргасан тогтоолын төсөлд томоохон асуудлыг хөндсөн байдаг. Тэрхүү асуудлыг шийдэхгүй, хөрөнгө оруулагч талтай ойлголцолд хүрэхгүй бол олон улсын шүүхэд маргаан үүсэх эрсдэлтэй юм биш үү?

-Хэлэлцээний явцад л асуудал тодорхой болно. Хоёр тал нэгдсэн байр сууринд хүрэх шаардлагатай. Хэлэлцээ бол олон улсын уул уурхайн төсөл дээр байдаг л асуудал. Тодорхой хэмжээний маргаан гарч л байдаг. Үүнийг жил тутам хоёр тал харилцан ойлголцож, асуудлаа шийдэж байх л хэрэгтэй. Энэ ч утгаараа үр дүнд хүрнэ гэдэгт итгэлтэй байна.