Жүжигчин Г.Анандын хэргийг ТЦА-аас шалгаж байна

Өнгөрөгч долоо хоногийн пүрэв гарагт буюу нэгдүгээр сарын 16-ны үүрээр нийслэлийн Хан-Уул дүүргийн 15-р хороо Их Монголын гудамжинд “Mercedes Benz G-500” маркийн автомашин “Toyota -Premio” маркийн автомашинтай мөргөлдсөн осол бүртгэгджээ. 

Ослын улмаас “Toyota -Premio” маркийн автомашины жолооч амь насаа алдсан аж.

Осол гаргасан гэгдэж буй “Mercedes Benz G-500” маркийн автомашиныг жүжигчин Г.Ананд жолоодож явжээ. Энэхүү ослын шалтгаан нөхцөлийг Тээврийн цагдаагийн албаны Мөрдөн шалгах хэлтэст шалгаж байгаа ба хэрэг гарах үед жүжигчин Г.Ананд согтуугаар замын хөдөлгөөнд оролцож байсан гэх мэдээлэл байна. 

Шөнийн цагаар замын хөдөлгөөний ачаалал бага байдаг энэ үед хөдөлгөөнд оролцож буй жолооч нар замын хөдөлгөөний дүрэм, заалт зөрчих, хурд хэтрүүлэх, согтуугаар тээврийн хэрэгсэл жолоодох, тэмдэг тэмдэглэгээ, гэрэл дохио зөрчих зөрчил их гаргадаг.

Иймд жолооч нар замын хөдөлгөөний дүрмээ баримталж, хурд хэтрүүлэхгүй байх, архи согтууруулах ундааны зүйл хэрэглэсэн үедээ жолоо барихгүй байж, болзошгүй эрсдэлээс сэргийлэхийг албаныхан санууллаа.