Истанбул-Улаанбаатарын онгоцонд тулгар эх амаржиж, ихэр охид төрүүлжээ

Өнөөдөр (2020.07.09) Истанбул-Улаанбаатар чиглэлийн тусгай үүргийн нислэгээр ирж буй тулгар эх агаарын хөлөгт амаржиж, хоёр ихэр охин төрүүлсэн тухай мэдээлэл ирлээ.

Нислэгт "Буянт-Ухаа" хилийн мэргэжлийн хяналтын эрүүл ахуй халдвар хамгааллын хоёр улсын байцаагч (мэргэжлийн эмч), ХӨСҮТ-ийн тархвар судлаач эмч хамт ниссэн бөгөөд эх, хүүхдийг эсэн мэнд амаржуулан, эмнэлгийн тусламж үйлчилгээ үзүүлж байна.

Тусгай үүргийн онгоц өнөө шөнө 01:13 цагт Улаанбаатарт газардах бөгөөд амаржсан эхийн ар гэрийнхэнтэй холбогдож, энэхүү баярт мэдээг хүргээд байна. 

Улсын онцгой комиссын шийдвэрийн дагуу Туркийн Истанбул хотоос иргэдээ татаж авах тусгай үүргийн онгоц өнөөдөр 06:30 цагт “Чингис хаан” олон улсын нисэх буудлаас хөөрсөн ба өнөө шөнө тус онгоцоор 250 гаруй иргэн эх орондоо буцаж ирэх юм.

Эх сурвалж: Мэргэжлийн хяналтын ерөнхий газар