“Рио Тинто”, “TRQ”-тай нэг түвшинд тоглох ёстой “Эрдэнэс Оюу Толгой"-н шинэ удирдлагыг их ажил хүлээж байна

Оюутолгой төслийн  хөрөнгө оруулалтын гэрээг эргэн харж, салхи оруулах ёстой, ёсгүй гэсэн талцал өнгөрсөн 11 жилийн хугацаанд “тогтвортой” байж өнөөдрийг хүрсэн. Нэг талаас  эдийн засаг дахь энэ төслийн нөлөөлөл томрох тусам гэрээнд өөрчлөлт оруулах тал дээр манай талын дуу улам сулрах дүр зураг харагдаж буй.

Хэдий тийм ч  “Оюу Толгой” ХХК-ийн хувьцааны 34 хувь Монголын Засгийн газрын мэдлийнх учраас засаж, залруулах боломж бүхий асуудлуудаа хөрөнгө оруулагч талтай ярилцах ёстой.

Тэр дундаа, төслийн 34 хувийг  Засгийн газрыг төлөөлөн эзэмшиж буй "Эрдэнэс МГЛ" ХХК-ийн охин компани "Эрдэнэс Оюу Толгой" ХХК-ийн зүгээс “оролцоотой” байх хэрэгтэй.

Гэвч Засгийн газрын 34 хувийг эзэмшээд 9 жилийн нүүр үзэж буй "Эрдэнэс Оюу Толгой" ХХК өнгөрсөн хугацаанд билгэ тэмдэгийн шинж чанартай л компани байж ирэв.

Тус компанийн гүйцэтгэх захирал  ​Цэвэгмидийн Түмэнцогт 2018 оны зургаадугаар сараас энэ оны аравдугаар сарыг хүртэл “Оюу Толгой” компанийн ТУЗ-ийн гишүүнээр ажилласан. Өмнөх ТУЗ-ийн гишүүдийн жишгээс ялгарахгүй билгэ тэмдэгийн шинжтэй гишүүн байж байгаад явж буй юм.

 “Оюу Толгой” компани дахь Монголын Засгийн газрын эрх мэдлийг хэрэгжүүлэх  том үүрэгтэй "Эрдэнэс Оюу Толгой" ХХК ер нь ямархуу түвшинд үйл ажиллагаа явуулдаг вэ, ажилтан албан хаагчдынх нь чадвар чансаа хэр вэ гэдгийг тандаж харж болохоор мэдээлэл “Шилэн данс”-нд байгааг тодотгоё.

Тус компанийн албан сайтаас харахад 4 дарга, 1 нягтлан бодогч, 9 мэргэжилтэн, 1 үйлчилгээний менежер, Гүйцэтгэх захирлын туслах, архив бичиг хэргийн менежер 1 хүний орон тоотойгоор үйл ажиллагаа явуулдаг аж.

Тэгвэл “Эрдэнэс Оюу Толгой" ХХК-ийн “Шилэн данс”-ны  “Цалингийн зардлаас бусад таван сая төгрөгөөс дээш үнийн дүн бүхий орлого, зарлагын мөнгөн гүйлгээ” гэсэн хэсэгт оруулсан мэдээллээс үзэхэд орчуулагчийн ажлын хөлс гэсэн зарлага тогтмол гаргадаг байх юм.

Дэлхийн уул уурхайн  салбарын том тоглогчид болох “Рио Тинто”, “Туркойз Хилл Ресурс” компаниудтай Монгол Улсын эрх ашгаа хамгаалан, харилцах, ойлголцох үүрэг хүлээсэн төрийн өмчит компани нь гадаад хэлний өндөр мэдлэгтэй өөрийн гэсэн боловсон хүчинтэй баймаар юм. Дараах зардлуудаас харахад компанийн цалингаас гадуурх зардлын багагүй хэсгийг орчуулгатай холбоотой зардал бүрдүүлж байна.

• 2020 оны дөрөвдүгээр сарын 20-нд Онлайн орчуулгын төхөөрөмж авахад 1,386,000 төгрөг
• 2020 оны  тавдугаар  сарын 5-нд Онлайн орчуулгын төхөөрөмж авахад 1,237,500 төгрөг тус тус зарцуулжээ.

Онлайн орчуулгын төхөөрөмжөөс гадна хэд хэдэн орчуулагчид орчуулгын хөлсийг шилжүүлсэн зарлагууд байгаа юм. Тухайлбал:

• 2020 оны дөрөвдүгээр сарын 9-нд Одгэрэлд 945,000 төгрөг
• 2020 оны дөрөвдүгээр сарын 6-нд Ганхуягт орчуулгын үнэ 2,000,000 төгрөг
• 2020 оны дөрөвдүгээр сарын 20-нд Базаргүрт орчуулгын үнэ 2,080,000 төгрөг
• 2020 оны дөрөвдугаар сарын 7-нд Базаргүрт орчуулгын үнэ 1,620,000 төгрөг
• 2020 оны долоодугаар сарын 3-нд Одгэрэлд орчуулгын үнэ 765,000 төгрөг
• 2020 оны долоодугаар сарын 3-нд Одгэрэлд орчуулгын үнэ 7,675,000 төгрөг
• 2020 оны долоодугаар сарын 8-нд Мандухайд орчуулгын үнэ 3,036,000 төгрөг
• 2020 оны долоодугаар сарын 17-нд Ганхуягт орчуулгын үнэ 3,840,000 төгрөг
• 2020 оны наймдугаар сарын 3-нд Мандухайд орчуулгын үнэ 1,840,000 төгрөг
• 2020 оны есдүгээр сарын 25-нд Мандухайд орчуулгын үнэ 600,000 төгрөг
• 2020 оны аравдугаар сарын 29-нд Одгэрэлд орчуулгын үнэ 2,349,359 төгрөг тус тус шилжүүлсэн гэж тайлагнажээ.

Мөн үүнээс гадна нэр бүхий хэвлэл мэдээллийн хэрэгслийг эзэмшигч компаниуд руу аравдугаар сарын 12-ны өдөр 2,950,000-17,640,000 төгрөг шилжүүлснээ “Шилэн данс”-нд тайлагнажээ.

Тус компанийн 2020 оноос өмнөх санхүүгийн мэдээллийг “Шилэн данс”-наас үзэж, танилцах боломж одоогоор байхгүй байгаа юм.

Тодотгоход, "Оюу Толгой" компанийн ТУЗ-д манай талаас шинээр томилогдсон хоёр гишүүний нэг нь цаашид "Эрдэнэс Оюу Толгой" компанийг удирдана гэсэн мэдээлэл байна. 

Эхэнд хэлсэнчлэн өнгөрсөн 11 жилийн хугацаанд яригдсан хөрөнгө оруулалтын гэрээний өөрчлөлтийн асуудал цаашид ямар түвшинд яригдах вэ, Монгол Улсын Засгийн газарт  нааштайгаар шийдвэрлэгдэх үү гэдэг чиглэлд  34 хувийг эзэмшигч "Эрдэнэс Оюу Толгой" компани оролцоотой, бодит нэмэртэй байх ёстойг сануулъя.