ШӨХТГ-аас үнийн хөөрөгдөл үүсгэсэн "Таван-Эрдэнэ", "Хүчит шонхор" захыг 20 сая төгрөгөөр торголоо

Монгол Улс дотооддоо халдвар алдсантай холбогдуулан Улсын Онцгой комисс болон Засгийн газрын шийдвэрээр Улаанбаатар хотод өнөөдрөөс /2020.11.11/ хөл хорио тогтоогоод байгаа билээ. 

Тэгвэл хөл хорионы үед зарим зах, худалдааны төв бараа, бүтээгдэхүүнийхээ үнийг үндэслэлгүйгээр нэмсэн зөрчил гарсан байна. Иймд ШӨХТГ-аас үнийг хөөрөгдөл, бараа бүтээгдэхүүний хомсдол зохиомлоор үүсгэсэн гэх үндэслэлээр зарим газарт хуульд заасны дагуу торгуулийн арга хэмжээ авчээ.  

Тодруулбал, "Таван-Эрдэнэ" болон "Хүчит шонхор" захыг үнийг хөөрөгдөл үүсгэсэн гэж үзэн тус бүр 20 сая төгрөгөөр торгох шийдвэрийг гаргасан байна. 

Энэ талаар албаныхнаас тодруулахад "Цар тахлын үед үнийн хөөрөгдөл үүсгэсэн хоёр захын захиргаанд торгуулийн арга хэмжээ авсан. Хуульд зааснаар тус бүр 20 сая төгрөгөөр торгосон" гэх тайлбарыг өглөө. 

Үнийн хөөрөгдөл зохиомол хомсдол үүсэхээс урьдчилан сэргийлж, шуурхай арга хэмжээ авч ажилласнаар дараах үр дүн гараад байна.

Үүнд:
1. Өглөө эрт Хүчит шонхор захад үүсэж байсан махны үнийг хянан шалгалт хийж, буулгалаа.
2. Махны үнийг нэмж зарсан хүчит шонхор, Таван-Эрдэнэ захуудад Зөрчлийн тухай хуульд заасны дагуу тус тус 20,000.000 (хорин сая) төгрөгийн торгууль оногдууллаа.
3. Томоохон сүлжээ дэлгүүр болох Имарт дэлгүүр, Номин сүлжээ дэлгүүр, Оргил худалдааны төв, CU сүлжээ дэлгүүр, Эфэс сүлжээ дэлгүүр, Түмэн шувуут ХХК зэрэг газрууд бараа бүтээгдэхүүний үнийн хөөрөгдөл бий болгохгүй, нөөц хэвийн байгаа талаар мэдэгдэл гаргасан.
4. Томоохон эмийн сан болох Монос Улаанбаатар ХХК, Ариун Монгол ХХК, Палома ХХК, Евро фарм ХХК, Хүрмэн ХХК-иуд амны хаалт, ариутгах бодисын үнийн хөөрөгдөл, зохиомол хомсдол үүсгэхгүй, тасралтгүй жигд хүртээмжтэй хүргэх талаар мэдэгдэл гаргасан.
5. Бөмбөгөр худалдааны төвөөс түрээслэгч нартаа үнийн хөөрөгдөл үүсгэхгүй байх, бараа бүтээгдэхүүний нийлүүлэлтийг хэвийн хангаж ажиллах талаар тушаал гаргаж, түрээслэгч нар нь дэмжиж гарын үсэг зурж, ШӨХТГ-т ирүүлсэн байна.