Мал, малчин хоёртоо одоо л туслахгүй бол ЦАГ АЛДАНА

Коронавируст цар тахлын өндөр эрсдэлтэй байгаа энэ үед зарим аймгуудад өвөлжилт хүндэрч, зуд болсны улмаас мал олноороо хорогдож буй нь нийгэм, эдийн засагт хавсарсан хүндрэлийг дагуулж болзошгүй байна.

Цар тахлаас хамааран экспорт саарч, ДНБ өндөр хувиар  унасан сүүлийн нэг жилд хамгийн тогтвортой байсан хөдөө аж ахуй тэрдундаа мал аж ахуйн салбараа дэмжих хэрэгцээ шаардлага өнөөдөр  их байгааг тодотгоё.

Тухайлбал, Баянхонгор аймаг гэхэд нутгийн ихэнх хэсэг нь гантай зуссан тул зудын “нэн эрсдэлтэй” нөхцөлд өвөлжиж байгаа бөгөөд одоогоор 250 орчим мянган мал хорогдсон гэх мэдээ байгаа юм.

Түүнчлэн УИХ-ын дарга Г.Занданшатар Баянхонгор болон бусад өвөлжилт хүндрэх магадлалтай аймгуудад туслах санаачилгыг өнгөрсөн оны аравдугаар сараас гаргаж, Засгийн газар, Улсын онцгой комисс, Хүнс, хөдөө аж ахуйн яам болон Дэлхийн банк, НҮБ-ын Хүнс, хөдөө аж ахуйн байгууллага зэрэг олон улсын болон хүмүүнлэгийн байгууллагуудад санал, хүсэлтээ илгээж байсан.

Өмнө нь Засгийн газар, Онцгой комисст биечлэн хүсэлт тавьснаар 480 тн өвс, 450 тн тэжээлээр тус аймгийн иргэдэд тусалсан. Дэлхийн банк, НҮБ-ын ХХАА-н байгууллага зэрэг олон улсын, хүмүүнлэгийн байгууллагаас мөн тусламж дэмжлэг үзүүлж байна. Өвлийн хүнд нөхцөл байдлыг давсан ч хахир хавар малчид, малын хувьд хатуу сорилт байдаг. Тиймээс тусламж, дэмжлэг цаашид ч хэрэгтэй байгаа нь нөхцөл байдлаас харагдаж буй.

Тиймээс УИХ-ын дарга Г.Занданшатар зудын нөхцөлд байгаа Баянхонгор аймгийн малчид, иргэдэд аж ахуйн нэгжүүдээс цугласан 400 гаруй тонн хүнсний  бүтээгдэхүүн, малын тэжээлийг энэ сарын 3-ны өдөр өөрийн биеэр хүлээлгэн өглөө. 

Түүнийг малчид, иргэдэд тусламж хүргэж явааг сошиал орчинд шүүмжлэгсэд байгаа. Ер нь бол дэлгэцийн араас шүүмжлэх амархан. Бодит байдалтай газар дээр нь танилцаж, хүндээ хүрч тус дэм болно гэдэг нэг өөр хэрэг.

300 үхэртэй айлын 250 үхэр үхэж 50  нь үлдсэн байхад өөр нэг малчны 120 богийн 90 нь үхэж 30 нь л үлдсэн харамсалтай дүр зураг Баянхонгорт байна. Хүнд хэцүү цаг үед монгол малчны хот харлаж үлдэх нь Монгол Улсын хувьд муу мэдээ. Тиймээс малчдынхаа үлдсэн малыг хахир хавар хорогдуулчихгүйн тулд боломж л байвал туслах ёстой байна.

УИХ-ын дарга Г.Занданшатар орон нутагт ажиллахдаа PCR шинжилгээ өгч, халдвар хамгааллын дэглэмийг хатуу баримталж, цагийн хатууд зүдэрч буй орон нутгийн малчдадаа тусламж, дэмжлэг үзүүлжээ.