Өвөр Монголын Алшаа аймагт ХӨЛ ХОРИО тогтоолоо

2021 оны 10 сарын 26

Сүүлийн үед ковидын халдварын голомт болоод байгаа Өвөр Монголын Алшаа аймгийн Эзнээ хошуунд өчигдрөөс (2021.10.25) хатуу хөл хорио тогтоолоо.

Тус аймгийн COVID-19 халдварыг хянах штабаас хошууны бүх иргэд, гаднаас ирсэн хүмүүсийг оршин суугаа газраасаа гарахыг хориглосон байна. Дураараа гэрээс гарсан хүмүүсийг иргэний болон эрүүгийн гэмт хэрэгт татаж, хариуцлага тооцох гэнэ.

Хошууны иргэдийг шинжилгээнд хамруулах, ариутгал цэвэрлэгээ болон хоол хүнс, шаардлагатай зүйлсийг иргэдийн гэрт хүргэх ажлыг шуурхайлан гүйцэтгэж байна.

Өнөө өглөөний байдлаар Эзнээ хошуунд энэ сарын 13-наас хойш халдварын 43 тохиолдол илрээд байгаа юм.

Өчигдөр буюу даваа гарагт эх газрын Хятадад ковидын дотоодын шинэ халдвар 29 бүртгэгдсэнийг БНХАУ-ын Эрүүлийг хамгаалах улсын хорооноос мэдээлсэн. Шинээр илэрсэн 29 тохиолдлын 19 нь Өвөр Монголд, 6 нь Ганьсу муж, Бээжин, Ниншя - Хотонгийн өөртөө засах оронд тус бүр 3, Шаньдунд 1 тохиолдол бүртгэгджээ. Мөн гадаадын халдвар 14 илэрсэн байна. 

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top