КОВИД 19: Хятадын зарим муж 3 настай хүүхдүүдийг вакцинжуулна

БНХАУ-ын зарим мужид 3-11 насны хүүхдүүдийг коронавирусний эсрэг вакцинжуулалтад хамруулахаар болсон тухай “Жунго жибао” сонинд мэдээлжээ.

Хубэй муж энэ сарын 25-наас энэ насны хүүхдүүдэд вакцин хийж эхлэх бол Хайнань муж энэ сарын 24-нд эхлэх гэнэ. Үүнээс гадна Жежян мужийн Сүжоу болон Жинхуа, Хунань мужийн Жужоу, Иян, Чандэ хотууд мөн энэ тухай мэдэгджээ.

БНХАУ-ын эрх баригчид 2021 оны зургаадугаар сард онцгой нөхцөлд 3-17 насны хүүхдүүдэд “Sinovac” компанийн ковидын эсрэг “CoronaVac” вакцин хэрэглэх зөвшөөрөл олгожээ.

Долоодугаар сарын 16-нд “Sinopharm” компанийн Бээжингийн био бэлдмэлийн хүрээлэнгийн гаргаж авсан идэвхгүйжүүлсэн вакцин, наймдугаар сарын 18-нд мөн л “Sinopharm” компанийн харьяа Уханийн био бэлдмэлийн судалгааны хүрээлэнгийн идэвхгүйжүүлсэн вакцинд зөвшөөрөл олгосон байна.

Тус улс долоодугаар сараас эхлэн 12-17 насны өсвөр настнуудыг вакцинд хамруулж эхэлсэн. Эхний ээлжид 15-17 насныхныг хамруулсан бол хоёрдугаар ээлжид 12-14 насны хүүхдүүдийг вакцинжуулжээ. Наймдугаар сарын дунд үеийн байдлаар, Хятадад 12-17 насны нийт 60 сая гаруй өсвөр настныг вакцинд хамруулаад байна.

Хамгийн сүүлийн үеийн мэдээллээр тус улсад нийт 2.24 тэрбум тун вакцин хийгээд байна.