Ч.Болортуяа: Эхлээд эмч, онцгойгийнхон вакцины IV тунд хамрагдана

Засгийн газрын өнөөдрийн /2022.01.05/ ээлжит хуралдаан үргэлжилж байна.

Хуралдаанаар халдварын эсрэг вакцины гуравдугаар тундаа хамрагдаад гурван сар болсон иргэдэд дөрөв дэх тунг хийх үүрэг чиглэлийг өгчээ.

Үүнтэй холбогдуулан яг одоо Эрүүл мэндийн сайд С.Энхболд, УОК-ийн Нарийн бичгийн дарга Т.Баярхүү нар мэдээлэл хийж байна.

Мэдээллийн эхэнд Засгийн газрын Хэвлэлийн төлөөлөгч Ч.Болортуяа "Өнгөрсөн сард халдварын тоо буурч байсан бол сүүлийн үед нэмэгдэх хандлагатай байна. Мөн томуу, томуу төст өвчин эрчимтэй тархаж байна. Нэгдүгээр сарын 4-ний байдлаар омикрон хувилбар дэлхийн 135 улсад бүртгэгдээд байна. Энэ хувилбараар нас баралт 104-т хүрээд байна. Үүнтэй холбогдуулан Засгийн газраас гадаадаас ирж байгаа иргэдийн тандалт, судалгааг эрчимжүүлэх үүрэг өглөө. Түүнчлэн вакцины гурав дахь тундаа хамрагдаад гурван сар болсон иргэдийг дөрөв дэх тунгийн хамралтыг сайн дурын үндсэн дээр зохион байгуулах, цар тахлын хариу арга хэмжээний багууд буюу эрүүл мэнд, онцгойгийн алба хаагчдыг хамруулахаар боллоо" гэх мэдээллийг өглөө.