ОХУ Хятадын нүүрсний зах зээлийг эзлэх боломжтой

ОХУ-аас Хятадад нийлүүлдэг коксжих нүүрсний хэмжээ өнгөрсөн оны мөн үетэй харьцуулахад 2,5 дахин нэмэгджээ. Шинжээчид Хятад, Энэтхэгийн зах зээлийг Оросын нүүрс хангаж чадна гэж үзэж байна.

Bloomberg-т бичсэнээр өнгөрсөн гуравдугаар сард Хятад улс Оросоос 1,4 сая тонн нүүрс худалдан авсан (2021 оны 3-р сард 550 мянган тонн) байна. Хятадад нийт цахилгаан эрчим хүчнийхээ 60 хувийг нүүрсний цахилгаан станцаар хангадаг тул Оросоос авах нүүрснийхээ хэмжээг нэмэх бодлого барьж байгаа гэнэ.

“Ийм нөхцөлд Хятадын нүүрсний гол нийлүүлэгч нь ОХУ болох магадлал өндөр” гэж “Известия” сонин бичжээ. Тус сонины шинжээч “ОХУ-ын гол өрсөлдөгч нь Австрали, Индонез, Монгол улсууд. Гэхдээ Австралийн хувьд ложистикийн хувьд хязгаарлагдмал, харин Индонез, Монголын нүүрс өндөр үнэтэй. Оросын нүүрс олборлогчдын хувьд сайхан боломж ч юуны өмнө Транс Сибирийн төмөр зам, Алс Дорнодын боомтуудын хүчин чадлыг нэмэгдүүлэх шаардлагтай “ гэж дүгнэсэн байна.

Хэдий дэлхий дахинд эко эрчим хүч гэж их ярих болсон ч “China Energy Investment Corp” 2022 онд Хятадын нүүрсний хэрэглээ 2,2 хувь нэмэгдэнэ гэж үзэж байна. Одоо ОХУ-аас Хятадад жилд 100 сая тонн нүүрс нийлүүлэх хэлэлцээр хийж эхлээд байгаа гэнэ. Дэлхийн улстөрийн байдлаас үүдэн, Европ тивд орос нүүрснээс татгалзах бодлого барьж эхэлсэн тул ОХУ нүүрсээ Азид гаргахаас өөр аргагүй болсон. Харин Хятад үүнийг нь ашиглан, маш хямд үнэ санал болгоод байгаа ажээ.