Бурхан багшийн их дүйчэн өдөр | РИНСРЭЛ ба ТУС ЭРДЭМ

2022 оны 06 сарын 14

 

Өнөөдөр Зуны эхэн сарын шинийн 15, Бурхан багшийн их дүйчэн өдөр. Энэ өдөр Нийтээр тэмдэглэх баярын болон тэмдэглэлт өдрүүдийн тухай хуулийн 4.1.10-т зааснаар бүх нийтээр амарч байна.

Бурхан багшийн их дүйчэн өдөр нь Бурхан багш эхээс мэндэлсэн, 37 насандаа гэгээрлийн хутгийг олсон, 81 насандаа ертөнцийн мөнх бусыг үзүүлж нирваан дүрийг олсон өдөр болох зуны тэргүүн сарын шинийн 15-ны өдрийг хэлнэ. Буддын шашинтнууд олноор амьдардаг улс орнуудад уг өдрийг нийтээр тэмдэглэх баяр болгон амрахаас гадна өөр олон улсад янз бүрийн хэлбэрээр тэмдэглэн өнгөрүүлдэг. Монгол Улсад 1990 оноос хойш тэмдэглэх болсон ба 2020 оноос бүх нийтийн амралтын өдөр болгосон.

Бурхан багшийн их дүйчэн өдөртэй холбогдуулан өчигдөр /2022.06.13/ Гандантэгчэнлин Хийдээс Бурхан багшийн их эрднийн шүтээн ринсрэлийг Бүгд найрамдах Энэтхэг улсаас залах ёслолын ажиллагааг зохион байгууллаа.

Уг ёслолд Монголын бурхан шашинтны төв Гандантэгчэнлин Хийдийн тэргүүн хамба Д.Чойжамц, Соёлын сайд Ч.Номин, БНЭУ-аас Монгол Улсад суугаа онц бөгөөд бүрэн эрхт Элчин сайд М.П.Сингх болон албаны бусад төлөөлөгчид оролцсон.

Энэхүү залан авчирсан ринсрэлийн тухайд Гандантэгчэнлин хийдийн Хамба лам Д.Чойжамц "Энэтхэг улсаас Бурхан багшийн ариун чандрыг залж ирж байгаа. Бурхан багшийг таалал төгссөний дараа чандрыг нь найм хувааж улс орнуудад тараасан. Дөрвөн ринсрэл Монгол оронд заларч байгаа нь буянтай үйл болж байна. Энэхүү ариун чандар заларсан газар болгонд амгалан жаргалан үүсэж, сайхан болдог гэдэгт бид итгэдэг.

Энэтхэг улстай 2000 жилийн өмнөөс найрсаг харилцаатай байсан. Бурхан багшийн чандар зургаадугаар сарын 14-нөөс хойш 11 хоногийн турш Гандантэгчэнлин хийдийн Батцагаан дуганд залагдана. Хүссэн хүн бүр ирж мөргөх боломжтой. Энэ насанд битгий хэл олон төрөлд олдохгүй, асар их буянтай бурхан багшийн лагшинд хүрсэнтэй ижил буян юм. Төгс гэгээрсэн бурхны лагшинд мөргөх боломж гарч байна. 1995 онд Бурхан багшийн чандар манай улс заларч байсан. Чойжин ламын сүмд заларч байдаг Бурхан багшийн шүдийг Энэтхэгээс ирж буй чандартай хамт Батцагаан дуганд залж, Монголын ард түмэн нийтээрээ мөргөж, асар их буян хураах боломж гарч байгаа юм" гэдэг мэдээллийг өмнө нь өгсөн.

 
БУРХАН БАГШИЙН ИХ ЭРДЭНИЙН ШҮТЭЭН РИНСРЭЛ БА ТУС ЭРДЭМ
 
Тоолшгүй гурван галавт буяныг хурааж, гэм бүгдийг арилган, эрдэм бүгдийг төгсгөсөн Бурхан багш хойч үеийн шавь нартаа буяныг хураалгахын орон болгож адистад их эрдэнийн шүтээн ринсрэлээ үлдээсэн ажгуу. Бурхан багшийн лагшин, зарлиг, тааллын агуу эрдмийн мөн чанарын илрэл болсон энэхүү шүтээн ринсрэлийг эртний Энэтхэгийн арван зургаан их вант улсын хаад хуваан авч, үлдсэнийг нь Шагжа хаант улсын нийслэл Капилвастуд залж хадгалсан болно.
 
Хожим номт их хаан Ашока бээр Бурхан багшийн их эрдэнийн шүтээн ринсрэлийг хадгалсан долоон суваргыг нээж түүнийг Маурын эзэнт гүрэн болон бусад улс оронд тараан залсан байдаг. Хутагт Энэтхэгийн орны засгийн газрын өндөр түвшинд нандигнан хадгалж байгаа Бурханы шашинтангуудын хосгүй өв эрдэнийн шүтээн Бурхан багшийн их эрдэнийн ринсрэл Монгол оронд 2022 оны зургаадугаар сарын 14-оос 24-ний өдөр хүртэл залагдаж байгаа болно.
 
Үүний зэрэгцээ 16-р зууны үед Цастын орноор дамжин Монголын бурханы шашны гал голомт Эрдэнэ Зуу хийдэд залагдаж байсан агаад эдүгээ Богд хааны ордон музейд хадгалагдаж байгаа Монголын соёлын хосгүй үнэт өв Бурхан багшийн их эрдэнийн ринсрэл мөн залагдаж байна. Бурхан багшийн их эрдэнийн ринсрэлийн адистадаар Бурханы шашны цогулам мандан дэлгэрэх, эв найрамдал бэхжих, ган зуд тэрүүтэн аюул гамшиг амирлах зэрэг цаглашгүй ач тустай билээ.
 
Бурхан багшийн их эрдэнийн ринсрэлд мөргөсний тус эрдмийг товч дурьдвал:
 
- Бурхан багштай бодитой учирсан, гүн номын барилдлага тогтоосон мэт машид ховор хувь тохиол бүрдэнэ.
- Бурхан багшийн адистад оршин энэ хийгээд олон төрөлдөө хэмжээлшгүй буяныг хураана.
- Асрал, нигүүлсэл агаад бодь сэтгэл арвидана.
- Сэтгэлийн амар амгаланг эдэлж, нирваан хийгээд төгс гэгээрлийн хутагт хүрэхийн шалтгаан хөрөнгө бүрдэнэ.
Амьтны зовлонг анагаах гагц эм Амгалан жаргалан бүхэн гарах орон
Авралт шашин өргөл хүндэтгэл лүгээ
Ашид өнө удаан орших болтугай.

 

Ринсрэл гэж юу вэ?

Буддын шашинт лам багш нарын чандрын үнснээс гардаг сувдан хэлбэртэй онцгой сонин зүйлийг ринсэл гэдэг. Тус содон зүйл буюу ринсэл нь энэрэнгүй сэтгэл хийгээд билиг ухааны эрдмийг олсоноор үүсэн буй болдог гэж үздэг. Сувдан хэлбэртэйгээс гадна шүд, ясны ринсэлүүд байдаг аж.

 

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Odod (103.26.194.88)  2022 оны 06 сарын 14

0  |  0
Buddha (73.25.114.116)  2022 оны 06 сарын 14

Zavaarsiin. Bi ta nariig iim mal bolno chinee sanasangui. Shavar baromal lam uns shuteheer ouyn uhaan saihan setgeliig shut. Minii surgaaliig guivuulsan ene lamtsaruud hoid nasandaa haluun tamd unah bolno.

0  |  0
Top