В.Путин барилгын чанарыг хянахыг Шүүгчдэд үүрэг болгов

Туркт болсон хүчтэй газар хөдлөлтийн улмаас олон барилга нурж, олон мянган хүний амь нас үрэгдсэний улмаас дэлхийн улс орнууд барилгадаа ихээхэн анхаарал хандуулж, эхлээд байна.  

ОХУ-ын Ерөнхийлөгч Владимар Путин Туркт болсон газар хөдлөлттэй холбогдуулан, ОХУ-ын газар хөдлөлтийн эрсдэлтэй бүс нутагт барьж байгаа барилгууд хууль ёсны дагуу эсэхийг шалгахыг Шүүгч нарт үүрэг болголоо.

Дээд болон цэргийн, арбитрын шүүгч нарын уулзалт дээр Путин “Туркт ямар гамшиг тохиолдсоныг бид харж байна. Тэнд дүрэм журам, газар хөдлөлтөөс хамгаалах нормыг сахиагүй барилгын компаниудад арга хэмжээ авч эхэлж байна. Ялангуяа газар хөдлөлтийн аюултай бүс нутагт барьсан барилгуудад асуудал их байгаа. Манайд ч гэсэн ийм аюултай бүс цөөнгүй бий. Өмнөд хэсэг, Алс Дорнодод газар хөдлөх эрсдэл их байгааг бүгд мэднэ” гэж ярилаа.

Мөн шүүгчдэд хандан “Шинэ барилгаас гадна хуучин барилгын засвар, өөрчлөлтөд ч анхаарал хандуулаарай. Хуучин барилгад шинээр өрөө гаргах, үйлчилгээний газрууд танхимаа томсгож, нэмэлт ашиг орлого олох гэсэн атгаг санаа их байгаа. Даацын ханыг буулгах зэрэг асуудал гардаг. Энэ бол маш аюултай. Барилгыг хууль бусаар засварлаад дараа нь өөрсдийгөө зөвтгөн, шүүхэд очдог. Илүү орлого олох, мөнгө хэмнэх гэсэн гэмт хэрэгтэй хатуу тэмцэх ёстой” гэж анхаарууллаа.