ЗТХ-ийн сайд С.Бямбацогт ТӨМӨР ЗАМЫН АВЛИГЫГ мэддэг байжээ

Их хэмжээний мөнгө гэрийнхээ сейфенд хадгалж байгаад хураалгасан С.Батдөлийн хэрэгт "Улаанбаатар төмөр зам" /УБТЗ/ ХНН-ийн нэр бүхий удирдах албан тушаалтнууд холбогдсон байж болзошгүй нөхцөл байдал үүсээд байна. Тодруулбал, энэ хэрэгтэй холбогдуулан тус байгууллагын зарим удирдах албан тушаалтнуудыг үүрэгт ажлаас нь чөлөөлжээ. Энэ талаар ТВ8 телевизийн "ТОЛЬ" мэдээллийн хөтөлбөрөөр хүргэлээ.

УБТЗ ХНН-ийн Тээвэр зохион байгуулалтын албаны орлогч дарга С.Батдөлийн гэрээс олдсон 7.3 тэрбум төгрөгийн эх сурвалжийг тогтохоор хуулийн байгууллагаас мөрдөн шалгах ажиллагааг явуулж байна. Учир нь С.Батдөл энэ мөнгөний эх үүсвэрийг тайлбарлаж, нотолж чадаагүй. Тиймээс магадгүй энэ мөнгөний цаана төмөр замын ачаа тээвэрлэлттэй холбоотой авлига, хээл хахуулын сүлжээ байж болзошгүй гэж хуулийн байгууллагаас төмөр замыг хамарсан томоохон шалгалтыг явуулж  байна.

Тэгвэл энэ хэрэгтэй холбогдуулан УБТЗ ХНН-ийн зарим удирдах албан тушаалтнуудыг үүрэгт ажлаас нь чөлөөлжээ. Ингэхдээ Оросын талаас УБТЗ-ын нэгдүгээр орлогч дарга Игорь Василивеч, Санхүү эрхэлсэн орлогч дарга Светлана Яковлевна нарыг чөлөөлсөн бол Монгол талаас нийгмийн асуудал эрхэлсэн замын орлогч дарга Ц.Хүрэлбаатарыг үүрэгт ажлаас нь чөлөөлөх шийдвэрийг гаргасан байна. УБТЗ ХНН-т ийнхүү халаа сэлгээ хийж эхэлсэн нь тус байгууллагын удирдах албан тушаалтнууд холбоотой авлига, хээл хахуулийн сүлжээ илчлэгдэж эхэлсэн гэх хардлагыг ч нийгэмд төрүүлж байна. Ер нь ч төмөр зам гэх тусдаа вант улс байгуулах шахсан энэ газарт авлига хээл хахуулийн сүлжээ ил цагаан байдаг гэдгийг салбар хариуцсан сайд нь ч хэлж байсан удаатай.

ДЭЛГЭРЭНГҮЙГ ВИДЕОГООР ХҮРГЭЕ